శశికళ/ప్రణయకోపన
ప్రణయకోపన
ఏల కోపంవచ్చినదొ నీ
మ్రోల నిలిచిన నన్ను చూడవు
బాలికా నావైపు తిరగవు
పంతగించితివో ?
వీణె మీటిన తీపి పాటలు
వేణు వూదిన గాన మంత్రము
జాణ! నీవై పలుకు లాడవు
ముగ్ధనాయికవా ?
పూల తావుల అలలు చూపులు
మాలతీ వల్లరుల నవ్వులు
నీల గగన విలాస లీలలు
దాచుకొన్నావా ?
కాళిదాస మనోజ్ఞ కవితా
కలశవార్నిధి వీచికలు నీ
కౌగిలింతలలోని వింతలు
నేడు చూపవుటే !
పచ్చ కర్పూరాన వెన్నెల
పసిడి సంజల సంపగులలో
పాటలీ కుసుమాన ఉషనులు
చుంబనము లేవీ !
మేల మాడవు గంధ మలదవు
పూల జడతో నన్ను కట్టవు
వాలు చూపుల నివాళించవు
ప్రణయ కోపనవా !
నేను చేసిన తప్పు లేవో
నేనె ఎరుగను
గాన పూజలొ అపశ్రుతిలా
కలత బెడితినొ
ఆన తప్పితినేమొ మోహో
ద్రిక్త విరసముననన్
ప్రాణకాంతా ! పాద పద్మము
మ్రోల వాలుదు
ప్రణయ లీలల
ప్రధమ తప్పిద
మెట్టిదై నను
ఏరికైన క్ష
మార్హమేకాదా ?