యెంకి పాటలు/పూల బాసలు
పూల బాసలు
పూలబాసలు తెలుసు యెంకి కీ
తోట
పూల మనసులు తెలుసు యెంకి కీ!
పూల మొక్కలనీటి
జాలుగని నిలుసుండి
పూలన్ని నీపాటె
ఆలించె నంటాది! పూలబాసలు...
పూలంటు కాలంటి
పున్నెముం దంటాది;
వగలమారీ పడుచు
నగదొడిగె నంటాది! పూల...
తెరలెత్తి పూపడవ
పరుగెత్తుతావుంటె,
దారెంట పూలొంగి
దణ్ణమిడె నంటాది! పూల...
పూలతో వియ్యాలు
పూలల్లొ కయ్యాలు
మానల్లె నన్నుంచి
తానె పూవౌనేమొ! పూల...