Jump to content

మాతృమూర్తి (పద్య శతకం)

వికీసోర్స్ నుండి
​
​
​

మరువలేను నిన్ను మాతృమూర్తి

(పద్య శతకం)

రచన గొట్టాపు శ్రీనివాసరావు సెల్ : 9542019064

ముద్రణ 2019, డిశంబర్

ప్రతులు 1000

వెల రూ || 40-00

ప్రతులకు 1. గొట్టాపు హారిక W/o. గొట్టాపు శ్రీనివాసరావు బంగారమ్మపేట, బ్రాంచి ఫోస్టు ఆఫీసు ఎదురుగా, సాలూరు విజయనగరం జిల్లా

డి.టి.పి. & ప్రింటింగ్ శ్రీ శ్యామలా ప్రింటింగ్ వర్క్స్ మెయిన్ రోడ్ - సాలూరు

సాలూరు సాహితీ మిత్ర బృంద ప్రచురణ: 03 ​అంకితం శ్రీ గొట్టాపు శివున్నాయుడుగారు ఈ పద్య కృతి స్వర్గీయ గొట్టాపు నాగమ్మగారు అమ్మలగన్న అమ్మలకు... 3 గొట్టాపు శ్రీనివాసరావు

Scanned with OKEN Scanner ​

మాతృమూర్తి శతకం గురించి నాల్గు మాటలు

“నవరస కవి చక్రవర్తి” “ప్రసంగ ప్రవీణ”

ఉ॥వే॥ శ్రీమాన్ ఎన్.సి.హెచ్. శ్రీరామ చక్రవర్తి

భద్రాచలం, చేపలుకు సంఖ్య : 9399958069

గొట్టాపు శ్రీనివాసరావు గారు నాకు దాలినాయుడు గారి ద్వారా పరిచయం. విజయనగరానికి చెందిన వర్ధిష్ణు కవి. విజయనగరం అనగానే మన తెలుగువారి చరిత్రను సజీవధారలా ప్రవహింపచేసిన విజయనగరం రాజుల కథలు, బొబ్బిలి రాజుల కథలు గుర్తుకువచ్చి ఒళ్లు జలదరిస్తుంది. తెలుగు సంగీతాన్ని విశ్వవ్యాప్తం చేసిన పూజ్యులు ద్వారం వేంకటస్వామి నాయుడుగారు, విజయనగరం కళాశాల ద్వారా తెలుగు సినీపాటలను రసమయం చేసిన ఘంటసాల, సుశీల, ఒక ప్రక్క హరికథను అందలాలెక్కించి ఊరేగించిన పుంభావ సరస్వతి ఆదిభట్ట వారు మన మనస్సులను ద్రవింపచేసి రసగంగలను ప్రవహింప చేస్తారు. ఆ గడ్డలో ఉన్న మహత్తును అణుమాత్రమైనా సంతరించుకొనని వారుండరేమో అక్కడ! అక్కడ ఏం జరిగినా ఆయా వ్యక్తుల ప్రతిభా పాటవాలతో బాటు ఆ నేల జీవశక్తి ఏదో ఆయా వ్యక్తులను మహనీయులుగా చేయడంలో పాత్ర వహిస్తుంది.

ప్రస్తుతానికి వస్తే-

తెలుగు సాహిత్యంలో ఆధునికంగా వేగంగా మార్పులు జరిగిపోతున్నాయి. చాలా చాలా మంది కవితలు వ్రాస్తున్నారు. దీనికి కారణాలు అనేకం. స్పందించే మనసు వ్రాయకుండా ఉండనీయక పోవడం ఒకటి. తన తలపులను ప్రపంచంలో పంచు కోవాలనే తపన ఒకటి. కవికి సాధారణంగా లభించే గుర్తింపూ, గౌరవ మర్యాదల పట్ల ఆసక్తి ఉండడం ఒకటి. ఇలా ​వివిధ కారణాలు. కారణం ఏదైనా వర్ధిష్ణువులచేత వ్రాయిస్తున్నది. పద్యాలు ప్రారంభించిన వారు ఎక్కువగా శతకాలు తోచడమూ ఏ పద్యానికి ఆ పద్యం వ్యస్తభావంతో నడపడంలో ఎంచుకుంటున్నారు. ఆటవెలది నడక వారికి సుఖంగా వెసులుబాటు ఉండడం దానికి కారణాలు.

గొట్టాపు శ్రీనివాసరావుగారు ఆంగ్ల ఉపాధ్యాయులు. మాతృమూర్తిని సంస్మరించుకుంటూ “మరువలేను నిన్ను మాతృమూర్తి” అనే మకుటంతో శతకం వ్రాసారు. అమ్మతో తమకు ఉన్న అనుబంధాన్ని, ప్రేమనూ, ఆత్మీయతనూ, భక్తినీ అత్యున్నత భావాలతో సంస్మరించుకున్నారు. శతకాలు వ్రాసినా అమ్మ ఋణం తీరదు కానీ కవి ఇంతకంటే ఏమి చేయగలడు? అక్షరనీరాజనం-నిజ జీవితాసేవతో పాటు, సమర్పించగలడు అంతే.! కవికి ఇది ఒక్కటే కాస్తోకూస్తో ఋణ విముక్త మార్గం. దానిలో చాలా మటుకు శ్రీనివాసరావు కృతకృత్యులయ్యారు. తేలిక బాసలో ఉండడం వల్ల మరల పద్యాలు ప్రత్యేకంగా ఉట్టంకించే పనికి పూనుకోవడంలేదు. ఈ భావాలూ క్రొత్తవి కావు - కానీ కవి ఆత్మీయతనూ స్పందనలతో తాదాత్మ్యాన్ని మనం గుర్తిస్తాము.

గొట్టాపు శ్రీనివాసరావు గారు ఆంగ్ల ఒజ్జగా ఉంటూ అమ్మబాసపై అభిమానంతో శతకం వ్రాయడం ఆహ్వానించదగినది. కవిత్వపు మెలకువలను వీరు ఇంకా ఆకళింపు చేసుకోవాల్సి ఉన్నది. అలాగే ఛందస్సులో మర్మాలనూ వశపరచుకోవలసి ఉంది. మరింత అధ్యయనమూ, అనుశీలనా చేసి మంచి కవిత్వం వ్రాయాలని గొట్టాపు వారిని కోరుతున్నాను. తద్వారా తెలుగు తల్లికి నిజమైన బాసా ఊడిగం చెయ్యాలని ఆకాంక్షిస్తున్నాను.

శ్రీనివాసరావు గారికి శతమానం భవతి

భద్రాచలం
27-11-2019

బాసకు కాలి తువ్వ

ఎన్.సి.హెచ్. చక్రవర్తి

​P. RAJANNA DORA, M.A.

M.L.A. 13-Saluru (ST) Assembly Constituency Vizianagaram District, A.P.; and Dy. Floor Leader A.P. Legislative Assembly Velagapudi 522238 AMARAVATHI.

Beside Judge Court, Official Colony (Street) Rama Colony, Saluru-535 591 Vizianagaram District. Andhra Pradesh Mobile : 9440830397, 7893504567 Whatsapp: 9491884567 E-mail : prajannadora@gmail.com/

అమ్మకు అమరత్వమిచ్చిన

శ్రీనివాసరావు మాస్టారు గారు అభినందనీయులు

నైతిక విద్య నేడు పాఠశాలలో ఒక భాగం. ఉపాధ్యాయుల భాద్యత కూడా. తల్లి దండ్రుల పట్ల గౌరవమూ, సభ్యుల పట్ల ప్రేమానురాగాలు విద్యార్థులతో వర్ధిల్లాలి. ఈ గురుతర భాద్యత పిల్లల లో పెంపొందింప జేయుటలో అమ్మా, నాన్నల తరువాత గురువులదే అని నా విశ్వాసం.

శ్రీ గొట్టొపు శ్రీనివాసరావు మాస్టారు గారు, మాతృదేవతకి మనసున ఆలయం నిర్మించి, అమ్మకు అక్షర నీరాజనంగా, 100 పద్యములకుపైగా సమర్పణం చేసి, “అమృతం త్రాగేవాళ్ళు, దేవతలూ, దేవుళ్ళు, అది కన్న బిడ్డలకు పంచేవాళ్ళు అమ్మా-నాన్నలు" అని ఒక కవి చెబితే - అమ్మతనానికి, అమ్మ ప్రేమకు, అమ్మ త్యాగానికి, అక్షర సత్యంగా - నేడు అమరత్వమిచ్చారు.

శ్రీ గొట్టాపు శ్రీనివాసరావు మాస్టారు గారు, సాలూరు సాహితీ మిత్ర బృందం ద్వారా సుపరిచితులు. ఆంగ్లోపాధ్యాయులుగా జిల్లా పరిషత్ ఉన్నత పాఠశాల, పాంచాలితో పనిచేస్తూ ఉన్నారు. గతంలోనే విద్యార్థులకు ఉపయోగపడే "క్రియాపదనిఘంటువును" రచించారు. ఇప్పుడు “మరువలేను నిన్ను "మాతృమూర్తి" అనే మకుటంతో చక్కని శతాధిక పద్య పుష్పాలను వారి వారి వారి వారి మాతృమూర్తిని, ఆమె సేవలనూ గుర్తుకు తెచ్చుకుంటారు. ఆర్ద్రతతో తల్లికి సమర్పించుకున్నారు. ఈ పద్యాలు చదువుతున్నంత సేపు ఎవరికి వారు, కళ్ళు తడుపుకుంటారు. ​ఉదాహరణకు మాస్టారుగారి మాటలలోనే చూస్తే

ఆ॥వె॥ మాట నేర్పినావు మమతను పంచియు
చదువు నేర్పినావు చక్కదిద్ది
ఆదిగురువు నీవే యాదర్శమూర్తివి
మరువలేను నిన్ను మాతృమూర్తి

నిజమే. అమ్మ ఆదిగురువు. ఆ మాతృదేవతకు అంకితమిచ్చిన శ్రీ శ్రీనివాసరావు మాస్టారు గారిని అభినందిస్తున్నాను. మరిన్ని మంచి రచనలను చేసి జాతికి అందివ్వాలని కోరుతున్నాను. శతాధిక పద్య పుష్పాలతో అమ్మను ఆరాధించిన శ్రీ శ్రీనివాసరావు మాస్టారిని మనసారా అభినందిస్తూ....

(పీడిక రాజన్నదొర)

​

కవితా పుష్పాలతో మాతృమూర్తిని అర్చించిన "గొట్టాపు"

'అమ్మ' అన్నపదం అనురాగానికి, ఆప్యాయతకు, ప్రేమకు, వాత్యల్యానికి, కరుణకు, దయకు ఆలవాలం. “దేవతలంతా ఒక వైపు అమ్మ ఒక వైపు-నీవు ఎటువైపంటే - ఒరిగేను అమ్మవైపు" అంటారు. “సి.నారే" గారు. ఈ నేలమీద మాతృదేవతను గూర్చి తడవని కవులుండరు. వారివారి అక్షర పుష్పాలతో 'అమ్మ'ను అర్చించారు. ఇలా ప్రతికాలంలోను కవులు అమ్మ యొక్క అమృత తత్వాన్ని కవిత్వ రూపంలో ప్రవహింపజేస్తునే ఉన్నారు. ఇదిగో ఈ వరుసలోని వాడే మా గొట్టాపు శ్రీనివాసరావు. ఆంగ్లోపాధ్యాయునిగా పనిచేస్తూ అమ్మభాషలో అమ్మను పూజిద్దామని తలంపుతో “మరువ లేను నిన్ను మాతృమూర్తి” అన్న మకుటంతో ఒక శతకాన్ని రచించాడు. అతనిని కవిగా తయారు చేసిన “సాలూరు సాహితీ మిత్ర బృందం" దానిని వెలువరించే పనిలో పడింది.

హృదయాన్ని 'కలం' గా చేసుకొని ఈ యువకవి రాసిన కొన్ని పద్యపాదాలను తిలకిస్తే... పాఠకులకు అతని ప్రగాఢ భక్తి అర్ధమౌతుంది.

"జోలపాట పాడి - జోకొట్టి జోకొట్టి హృదిని పాన్పుచేసి - నిదుర పుచ్చి పెంచి నట్టి నిన్ను - ప్రేమగా సేవింతు మరువలేను నిన్ను - మాతృమూర్తి”

ఇలా ఆటవెలదుల్లో ఆర్థతగా వ్రాసిన ఈ కవి అభినందనీయుడు.

“అలక పాన్పునెక్కి - ఆకలైనేనుంటె బువ్వ పెడితివీవు బుజ్జగించి"

ఇలా ప్రతీ పద్యంలోను అమ్మ అనురాగ బంధాన్ని కవిత్వగంధంతో అలది పూజించడానికి ప్రయత్నం చేసారు. శ్రీనివాసరావుగారు. ఈ పద్యాలను మేము చాలావరకు సరిచేసి, మరో కవిపండితులు శ్రీమాన్ ఎన్.సి.హెచ్. శ్రీరామ చక్రవర్తి గారి సూచనలు సవరణలను కూడా జోడించి, పాఠకలోకానికి ఈ కృతిని అందిస్తున్నాం. మీరిచ్చిన అభినందనలే-ఈ యువకవికి ఆశీర్వచనాలు కాగలవు. మరిన్ని మంచి రచనలు చేయాలని శుభాకాంక్షలు తెలుపుతూ....

జె.బి. తిరుమలాచార్యులు, అధ్యక్షులు : కిలపర్తి దాలినాయుడు కార్యదర్శి :

సాలూరు సాహితీ మిత్రబృందం, సాలూరు

​జి.కె. ఐ కేర్

మెయిన్ రోడ్, గొల్లవీధి జంక్షన్, సాలూరు. సెల్ : 9989838303 కంప్యూటరైజ్డ్ కంటి తనిఖీ కేంద్రం Opthalmic Consultanat : Mr. G. KARUN, DOA, MIMS Regd.No. 938/Opthal/Appmb/2009

శ్రీ గురవే నమ:

నాకు జన్మనిచ్చిన తల్లిదండ్రులకు, విద్యాబుద్ధులను నేర్పి నాకు, నా జీవితానికి ఒక అర్థాన్నిచ్చిన నా పూజ్య గురుదేవులకు ముందుగా కృతజ్ఞతాంజలిని సమర్పిస్తున్నాను. మన మాతృభాషను ఒక విషయంగా మాత్రమే పరిగణించడం, నిజానికిది తెలుగు భాషామతల్లికి గొడ్డలి పెట్టే. భవిష్యత్తరాలకు మార్గదర్శియై, తెలుగు భాష వెలుగు లీనాలని, ప్రతి ఒక్కరు వారివారి మాతృభాషా మాధ్యమాలలో చదువుకొని ప్రగతి దారుల ప్రయనించాలని, మా గురువుల ఈ మాతృభాషా యజ్ఞంలో నేనొక సమిధను కావాలని, మా గురువుగారు శ్రీ గొట్టాపు శ్రీనివాసరావు మాస్టారు రచించిన ఈ పుస్తకాన్ని ముద్రించే మహత్తర భాగ్యాన్ని నా శిరస్సున నెత్తుకున్నాను. ఇటువంటి మహత్కార్యంలో నన్ను భాగస్వామిని చేసినందుకు సాలూరు సాహితీ మిత్ర బృంద అధ్యక్షులు శ్రీ జె.బి. తిరుమలాచార్యులు మాస్టారు గారికి ఋణపడుతున్నాను. మా సాలూరు సాహితీ మిత్ర బృందానికి ధన్యవాదములు తెలుపుతూ.... నేటి విద్యార్థులకు, యువకులకు ఉపయోగపడే మరిన్ని కార్యక్రమాలు నిర్వహించాలని, రచనలను చేపట్టాలని సవినమ్రంగా విన్నవించుకుంటున్నాను.

కృతజ్ఞతాభివందనాలతో... జి. కరుణ్ ​వినయాంజలి

అమ్మ అనే పదం ఓ అమృత భాండం. అమ్మ ఇలపై గల తొలిదేవత ఆ దేవతా మూర్తే, నను గన్న మాయమ్మ కీ॥శే॥ గొట్టపు నాగమ్మ గారు.

ఆ దయావారాశి యొక్క వాత్సాల్యామృతవర్షమే నా ఈ పద్యకృతి. ఆ అమ్మతత్త్వం మరువలేనిది. మరుపురానిది. ఎన్ని పూలతో పూజించినా, ఆమె ఋణం తీరనిది. ఆమెను సార్వజనీనకంగా స్మరిస్తూ “మరువలేను నిన్ను మాతృమూర్తి” పేరుతో మీ ముందు శతాధిక పద్య పుష్పాలనుంచుతున్నాను.

సాహిత్య అభిలాష తప్ప ఎలా వ్రాయలో తెలియని నాకు కవిత్వం వ్రాయడం నేర్పించి, వారి సాలూరు సాహితీ మిత్ర బృందంలో సభ్యునిగా చేర్చుకుని, పద్యం వ్రాయడానికి కావలసిన గణ, ప్రాస, యతి నియమాలను తెలియజేసి, ప్రోత్సహించడమే గాక ఈ కృతిని ముద్రించుటకు కూడా ప్రేరణగా నిల్చిన శ్రీ జె.బి. తిరుమలాచార్యులు, శ్రీ కిలపర్తి దాలినాయుడు మాస్టార్లకు వినయపూర్వక కృతజ్ఞతాంజలి.

నా ఈ పద్యకృతికి గుణదోష పరిష్కారం గావించిన పండిత వరేణ్యులు, ఉభయవేదాంతులు శ్రీమాన్ నల్లాన్ చక్రవర్తుల శ్రీరామ చక్రవర్తి, భద్రాచలం గారికి శతాధిక పాదాభివందనాలు.

నాపై గల అభిమానంతో ముందుమాటలను అందించిన మా ప్రాంత అభివృద్ధి ఏలిక, గౌరవ శాసన సభ్యులు, శ్రీ పీడిక రాజన్నదొరగారికి కృతజ్ఞతాంజలి. 10 ​ పద్యకృతిని గూర్చివిని సంతోషంగా గురుపాదార్చనగా భావించి ఆర్ధిక సహకారాన్ని అందించిన నా ప్రియ శిష్యులు చి॥ గుడిశ కరుణ్‌కు నా శుభాశీస్సులు. వారి తల్లిదండ్రులయిన శ్రీమతి & శ్రీ గుడిశ రామలక్ష్మీ, జగదీష్ గార్లకు నా హృదయపూర్వక నమోవాకములు. నిత్యం నా ఎదుగుదల నా కోరుకునే నా తండ్రి శ్రీ గొట్టాపు శివున్నాయుడు గారికి, మా మామయ్యలు శ్రీ మడక రామక్రిష్ణగారికి, శ్రీ మడక రామమోహన్ గారికి అనేక నమస్కారాలు.

అను నిత్యం నావెన్ను తట్టి ప్రోత్సహిస్తున్న సాలూరు సాహితీ మిత్ర బృంద గౌరవాధ్యక్షులయిన శ్రీ జరజాపు ఈశ్వరరావు గారికి, నా సాలూరు సాహితీ మిత్రబృంద సభ్యులకు, స్నేహశీలి, మంచిని ప్రోత్సహించే మా పాఠశాల ప్రధానోపాధ్యాయులు, గౌ|| శ్రీ టి. నాగేశ్వరరావు మాస్టారు గారికి, నా పాఠశాల ఉపాధ్యాయ ఉపాధ్యాయేతర బృందానికి, సాహిత్య విషయాలను నాతో ముచ్చటించే శ్రీ శివలెంక ప్రసాదరావు మాస్టారు గారికి, ఎల్లప్పుడు ఈ శిష్యపరమాణువు యొక్క అభివృద్ధిని కోరుకొని మా గురువుగారు శ్రీ మహంతి రాంబాబు మాస్టారు గారికి నా కృతజ్ఞతా పూర్వక అభివాదాలు.

ఇచ్చిన అతి కొద్ది సమయంలోనే అందమైన పుస్తకంగా తీర్చిదిద్దిన శ్యామలా ప్రింటర్స్ అధినేత శ్రీ బుడ్డెపు ఆనందరావు గారికి, చక్కగా డి.టి.పి. చేసిన చి|| ఇమంది చిన్నమ్మలుకు వారి బృందానికి కృతజ్ఞతలు. పాఠక దేవుళ్ళారా!

మీ ప్రోత్సాహమే నాకు ఇంధనం. నా ఈ పుస్తకాన్ని ఆదరించి నన్ను ముందుకు నడిపిస్తారని సప్రశ్రయంగా మిమ్ము ప్రార్ధిస్తూ.... మీ గొట్టాపు శ్రీనివాసరావు 11 Scanned with OKEN Scanner ​

ఆ.వె.⁠

అమ్మ గొప్పదనము నాటవెలది యందు
చెప్పదలచినాను గొప్ప గాను
సహకరించుమమ్మ చల్లగా దీవించి
మరువలేను నిన్ను మాతృమూర్తి

⁠ 1


ఆ.వె.⁠

అజుడునన్ని చోట్ల నవతరించనులేక
అమ్మ నంపినాడు మమ్ము బ్రోవ
తల్లి నీదు ప్రేమ దైవాన్నే మరిపించు
మరువలేను నిన్ను మాతృమూర్తి

⁠ 2


ఆ.వె.⁠

తెలుగు భాష యందు తీయనైన పదము
మనిషి మదిని దాగు మంచి పదము
అన్ని భాషలందు నాదిపదమె 'అమ్మ'
మరువలేను నిన్ను మాతృమూర్తి

⁠ 3


ఆ.వె.⁠

పుడమి భాషలన్ని వడకట్టి వెదకినా
జనని పదముకెపుడు సమము గావు
అమ్మయనెడి మాట అమృతతుల్యమగును
మరువలేను నిన్ను మాతృమూర్తి

⁠ 4


ఆ.వె.⁠

పిండ దశను నేను పిడుగుద్దులనిడిన
నీదుగర్భమందు నెలల నాడు
తన్మయత్వముగను తల్లివై మోసితి
మరువలేను నిన్ను మాతృమూర్తి

⁠ 5

​

ఆ.వె.⁠

కష్టమైనను తినె పౌష్టికాహారము
నిష్టమైన బిడ్డయెదుగుదలకు
నెలలు నిండు వరకు నెలవు నీవైతివి.
మరువలేను నిన్ను మాతృమూర్తి

⁠ 6


ఆ.వె.⁠

గర్భమందు నేను గడబిడ చేసితి
కరమునుంచి నీదు కడుపు పైన
తనివిదీర నన్ను తల్లి! తాకితివీవు
మరువలేను నిన్ను మాతృమూర్తి

⁠ 7


ఆ.వె.⁠

ప్రసవ వేదనంత పంటి యందుననుంచి
ఊపిరూది పిదప నుగ్గు వట్టి
నాకు జన్మనొసగు నడయాడు దేవతా!
మరువలేను నిన్ను మాతృమూర్తి

⁠ 8


ఆ.వె.⁠

నన్ను గర్భమందు నవమాసములు మోసి
జన్మనిచ్చినట్టి సాధ్వివీవు
నీదు సేవ యిచ్చు నిజమైన ముక్తిరో
మరువలేను నిన్ను మాతృమూర్తి

⁠ 9


ఆ.వె.⁠

పురిటినొప్పులన్ని పూర్తిగా భరియించి
జన్మనిచ్చు వేళ జడుపును విడి
చచ్చి బతికినావు చావునోడించితి
మరువలేను నిన్ను మాతృమూర్తి

⁠ 10

​

ఆ.వె.⁠

తనువు పులకరించె తల్లి నీవు పిలువ
కనులు నిన్ను చూచి కాంతులీనె
మనసు నిన్ను తలచి మైమరచెనుగదా!
మరువలేను నిన్ను మాతృమూర్తి

⁠ 11


ఆ.వె.⁠

జన్మనిడితివీవు జవసత్వములు పోసి
నీదు కష్టమిలను నిరుపమమ్ము
నాదు కనులకీవె నడిచేటి కోవెల
మరువలేను నిన్ను మాతృమూర్తి

⁠ 12


ఆ.వె.⁠

ఆకలిగొని నేను వెక్కి వెక్కేడ్వగ
కనుల నుండి తల్లి కరుణ కారె
క్షీరమిచ్చినీవె తీర్చితి క్షుత్తును
మరువలేను నిన్ను మాతృమూర్తి

⁠ 13


ఆ.వె.⁠

అమ్మ మాట వినిన కమ్మగానుండును
అమ్మ పాట చెవిని యమృతధార
అమ్మ గొంతు తీపియవనిని లేదులే
మరువలేను నిన్ను మాతృమూర్తి

⁠ 14


ఆ.వె.⁠

పండు వెన్నెలేల పట్టు పరుపులేల
అమ్మ జోలపాట నందుకొనిన
మమతలూరునట్టి మధుర గీతమదియే
మరువలేను నిన్ను మాతృమూర్తి

⁠ 15

​

ఆ.వె.⁠

జోలపాట పాడి జోకొట్టి జోకొట్టి
హృదిని పాన్సు చేసి నిదుర పుచ్చి
పెంచినట్టి నిన్ను ప్రేమగా సేవింతు
మరువలేను నిన్ను మాతృమూర్తి

⁠ 16


ఆ.వె.⁠

ముద్దుగ నను గాంచి ముద్దు మాటలు విని
మురిసి పోతివమ్మ ముదము గలిగి
ముసిముసి నగవులను మోముపై నింపితి
మరువలేను నిన్ను మాతృమూర్తి

⁠ 17


ఆ.వె.⁠

రాత్రి యందె కాచు రజనీశుడిలలోన
దినమునందె కాచు దినకరుండు
అమ్మ నన్ను కాచునన్ని వేళలయందు
మరువలేను నిన్ను మాతృమూర్తి

⁠ 18


ఆ.వె.⁠

అమ్మ నీదు మనసు కమ్మనైన మనసు
బిడ్డ బాగు కోరు దొడ్డ మనసు
కన్న తల్లి నీది వెన్నలాంటి మనసు
మరువలేను నిన్ను మాతృమూర్తి

⁠ 19


ఆ.వె.⁠

అమ్మ కన్న గొప్ప యనుబంధమేలేదు
అంతులేని ప్రేమ యమ్మ చూపు
అమ్మ చూపు పుడమి ననురాగమంతయు
మరువలేను నిన్ను మాతృమూర్తి

⁠ 20

​

ఆ.వె.⁠

మాట నేర్పినావు మమతను పంచియు
చదువు నేర్పినావు చక్కదిద్ది
ఆదిగురువు నీవెయాదర్శమూర్తివి
మరువలేను నిన్ను మాతృమూర్తి

⁠ 21


ఆ.వె.⁠

విసనకర్ర తోటి వేసవిని విసరి
చల్ల గాలినిచ్చి చలువ పరచి
వేసవంత నీవు వెన్నెల చేసితి
మరువలేను నిన్ను మాతృమూర్తి

⁠ 22


ఆ.వె.⁠

అలక పాన్సునెక్కి ఆకలై నేనుంటె
బువ్వ పెడితివీవు బుజ్జగించి
మమత పంచియలక మరిపింప జేసితి
మరువలేను నిన్ను మాతృమూర్తి

⁠ 23


ఆ.వె.⁠

బిక్కు బిక్కుమనుచు భీతిచెందినపుడు
ధైర్యమిడితివీవు దైవము వలె
బలమునిచ్చినావు బాధ్యత నేర్పుచున్
మరువలేను నిన్ను మాతృమూర్తి

⁠ 24


ఆ.వె.⁠

హద్దు లేని ప్రేమ హాయిగా పంచియు
ముద్దు మురిపెమంత మూటగట్టి
బుద్ధులెన్నొ తెల్పి శుద్ధిగా పెంచితి
మరువలేను నిన్ను మాతృమూర్తి

⁠ 25

​

ఆ.వె.⁠

అంతులేని ప్రేమ నమ్మయే చూపును
అమ్మ కన్న గొప్ప బొమ్మయేది ?
అమ్మ చూపు నెప్పుడనురాగమంతయు
మరువలేను నిన్ను మాతృమూర్తి

⁠ 26


ఆ.వె.⁠

అమ్మ గోరు ముద్దలమృతము వలెనుండు
నిత్య సత్యమిదియె నేల పైన
అమరులైన పొందరమ్మ చేతి సుధను
మరువలేను నిన్ను మాతృమూర్తి

⁠ 27


ఆ.వె.⁠

స్వచ్ఛమైన ప్రేమ మచ్చ లేకుండగ
పంచితీవు తల్లి యంచితముగ
అమ్మ నీదు ప్రేమ యమృతమ్ము ధరణిని
మరువలేను నిన్ను మాతృమూర్తి

⁠ 28


ఆ.వె.⁠

కస్సుబుస్సుమనక కరుణ చూపితినీవు
చిలిపిచేష్టలెల్ల చేసినపుడు
మంచి చెప్పినపుడు మమతను పంచితి
మరువలేను నిన్ను మాతృమూర్తి

⁠ 29


ఆ.వె.⁠

చెడును విడువమనుచు చిన్ని శిక్షలు వేసి
శ్రీలనొసగితీవు శ్రీలు పలికి
తల్లి నిన్ను మించు తత్త్వశాస్త్రములేదు
మరువలేను నిన్ను మాతృమూర్తి

⁠ 30

​

ఆ.వె.⁠

అందనట్టి మామ ఆకాశమందున
అందు చందమామ యమ్మకాదె
అమ్మ కన్న చలువ యవనిని లేదులే
మరువలేను నిన్ను మాతృమూర్తి

⁠ 31


ఆ.వె.⁠

గోల గోల చేసి గొడవ చేయునపుడు
ఊరడించితమ్మ యోర్మి తోడ
విసుగు చెందకుండ విలువలు నేర్పితి
మరువలేను నిన్ను మాతృమూర్తి

⁠ 32


ఆ.వె.⁠

నీతి కథలు చెప్పి నీతిపై నడిపించి
తీర్చిదిద్దినావు తీరుగాను
ధర్మశాస్త్రములను దండిగా నేర్పితి
మరువలేను నిన్ను మాతృమూర్తి

⁠ 33


ఆ.వె.⁠

అర్ధమేది లేదు వ్యర్ధమౌ నీమాట
అమ్మ పెట్టుననిరి అడిగినపుడు
అడగకుండ పెట్టు నమ్మ వెన్న మనసు
మరువలేను నిన్ను మాతృమూర్తి

⁠ 34


ఆ.వె.⁠

అమ్మ చేతి వంట అమృతము వలె నుండు
పంచ భక్ష్యములను మించిపోవు
తినగ తినగ మరల తినవలెననిపించు
మరువలేను నిన్ను మాతృమూర్తి

⁠ 35

​

ఆ.వె.⁠

సంతు చూచినపుడు సంతోషమొందుచున్
కడుపు నిండునటుల కుడుపుతావు
కన్న పేగు కంటె గట్టిబంధము లేదు
మరువలేను నిన్ను మాతృమూర్తి

⁠ 36


ఆ.వె.⁠

కరువు కాటకాలు కలిసి వచ్చిననేమి
కడుపు తీపి వలన కలత లేక
కడుపు నింపినావు కష్టమునోర్చుచు
మరువలేను నిన్ను మాతృమూర్తి

⁠ 37


ఆ.వె.⁠

తప్పు చేసినపుడు దండన గావించి
ఒప్పు చేయునట్లు మెప్పునిచ్చి
బతుకు నందు నీతి బాట చూపించితి
మరువలేను నిన్ను మాతృమూర్తి

⁠ 38


ఆ.వె.⁠

అమ్మ చెంత నుండి నాశీస్సులిచ్చియు
ప్రేమ తోడ మమ్ము పెంచినావు
కాచినావు మమ్ము కంటిరెప్పలవలె
మరువలేను నిన్ను మాతృమూర్తి

⁠ 39


ఆ.వె.⁠

అమ్మ నాకు నీవెయాత్మ నిదర్శనం
త్యాగమూర్తివీవె తనువునిడితి
ధర్మపథము చూపు ధర్మమూర్తివిసుమ్మి
మరువలేను నిన్ను మాతృమూర్తి

⁠ 40

​

ఆ.వె.⁠

గతుకులబతుకులకు గట్టి గమ్యమునిడి
సంతు బాగునందు సంతసించి
తపనపడితివమ్మ తాపసివియగుచు
మరువలేను నిన్ను మాతృమూర్తి

⁠ 41


ఆ.వె.⁠

ఆపదలగు వేళనండగా నీవుండి
నన్ను ప్రోత్సహించి వెన్ను తట్టి
త్రోవచూపినావు జీవితగమనాన
మరువలేను నిన్ను మాతృమూర్తి

⁠ 42


ఆ.వె.⁠

నీవు తినక దాచి నీదు సంతుకుబెట్టి
త్యాగముర్తివైన తల్లి నీవు
నిలువుటద్దమీవె నిస్వార్థ ప్రేమకు
మరువలేను నిన్ను మాతృమూర్తి

⁠ 43


ఆ.వె.⁠

అవని రక్షణకును నాభానుడుండెను
విశ్వమొందు రక్ష విష్ణు వలన
తల్లి రక్షనిచ్చు తనయింటికెప్పుడు
మరువలేను నిన్ను మాతృమూర్తి

⁠ 44


ఆ.వె.⁠

పండుగలగు పూట పిండివంటల జేసి
సంతుకిచ్చునమ్మ సంతసమును
అమ్మ నీదు సేవలానందకరమగు
మరువలేను నిన్ను మాతృమూర్తి

⁠ 45

​

ఆ.వె.⁠

కోరినపుడు నాకు కొండంత యండగా
సాయపడితివీపు చక్కగాను
సాన్నిహిత్యమనగ సాక్ష్యమే నీవమ్మ
మరువలేను నిన్ను మాతృమూర్తి

⁠ 46


ఆ.వె.⁠

మట్టిలోన దొర్లి బట్టలన్నియు మాపి
ఇంటి ముందు నిల్చియేడ్చినపుడు
నాకు లాల పోసి సోకులు చేసితి
మరువలేను నిన్ను మాతృమూర్తి

⁠ 47


ఆ.వె.⁠

పరిసరాలనెపుడు పరిశుభ్రముగనుంచి
స్వస్థతనిడినావు సహనమెంచి
స్వార్థమింత లేని సాధ్వి నీవౌదువు
మరువలేను నిన్ను మాతృమూర్తి

⁠ 48


ఆ.వె.⁠

పెద్ద బాలశిక్ష శ్రద్ధగా చదివించి
వృద్ధి చేయు నాదు బుద్ధి
జ్ఞానతృష్ణకీవె జననివై నిలిచితి
మరువలేను నిన్ను మాతృమూర్తి

⁠ 49


ఆ.వె.⁠

తల్లి ప్రేమ చూడ తరగని నిధియగు
తుహిన గిరులయందు తుహినమువలె
తల్లి ప్రేమకుండు చల్లనీటి గుణము
మరువలేను నిన్ను మాతృమూర్తి

⁠ 50

​

ఆ.వె.⁠

అమ్మ మాకు నీవెయాదర్శ మూర్తివి
మంచి గుణములన్ని యెంచి నేర్పి
ప్రగతి పథము నందు పయనింప జేసితి
మరువలేను నిన్ను మాతృమూర్తి

⁠ 51


ఆ.వె.⁠

కలలు నిజము చేయు కల్పతరువు నీవు
శిలను మార్చినావు శిల్పమువలె
నిలను నీవె అమ్మ యిలవేల్పువైనావు
మరువలేను నిన్ను మాతృమూర్తి

⁠ 52


ఆ.వె.⁠

సులభ సూత్రములను సూటిగా సూచించి
చదువు సంధ్య లందు పదును పెట్టి
నన్ను పెంచినట్టి నా సరస్వతివీవు
మరువలేను నిన్ను మాతృమూర్తి

⁠ 53


ఆ.వె.⁠

అమ్మ నీవె చూతువన్ని మంచి చెడులు
బాధ్యతంత మోయు భారమైన
నీవు లేని యిల్లు నిప్పుల కొలిమగు
మరువలేను నిన్ను మాతృమూర్తి

⁠ 54


ఆ.వె.⁠

అమ్మ పంచినట్టి యాత్మీయ ప్రేమది
పంచ భూతములను మించు సుమ్మి
అమ్మ ప్రేమ సాటి యమృతమ్ము దొరకునా
మరువలేను నిన్ను మాతృమూర్తి

⁠ 55

​

ఆ.వె.⁠

తండ్రి నేర్పు విద్య ధనము నందించును
గురువు నేర్పు విద్య కూడు పెట్టు
అమ్మ నీదు విద్య యాత్మసాక్షి నిడును
మరువలేను నిన్ను మాతృమూర్తి

⁠ 56


ఆ.వె.⁠

చదువులేని నాడు చదువు విలువ తెల్పి
మదిని మార్చినావు చదివినట్లు
విధిని తెలియపరచి వినయము నేర్పితి
మరువలేను నిన్ను మాతృమూర్తి

⁠ 57


ఆ.వె.⁠

వీనులకును విందు వినగ నీదు పలుకు
కన్నులార కంటి కరుణ నీది
ఇంటి దీపమీవె యింటిల్లిపాదికి
మరువలేను నిన్ను మాతృమూర్తి

⁠ 58


ఆ.వె.⁠

తెల్లవారువేళ తల్లికాళ్లకు మొక్కి
పనులు చేయ మంచి ఫలితమొసగు
తల్లి దీవెనలిడ దైవమిడినయట్లు
మరువలేను నిన్ను మాతృమూర్తి

⁠ 59


ఆ.వె.⁠

శిలనునైన నన్ను శిల్పంబు గావింప
నీవె చేర్చినావు నిజపధాన
నుల్లమందు ప్రేమ పల్లవినూదుచు
మరువలేను నిన్ను మాతృమూర్తి

⁠ 60

​

ఆ.వె.⁠

తనకు పాతచీరె తృప్తినిచ్చుననుచు
కొత్తబట్టలిచ్చు కొడుకుకెపుడు
త్యాగమంటి నీవె తల్లి యవనియందు
మరువలేను నిన్ను మాతృమూర్తి

⁠ 61


ఆ.వె.⁠

కన్నతండ్రి నిన్ను కన్నీటి పాలేయ
కట్టుకున్న భార్య కసురుకున్న
కన్నతల్లి సాకు కంటిపాపగ కదా
మరువలేను నిన్ను మాతృమూర్తి

⁠ 62


ఆ.వె.⁠

నన్ను కన్నతల్లి నాయింటనుండగ
వెదుకుటేల నాదు వేల్పు కొరకు
తల్లి కన్న గొప్ప దైవమ్ము గనబోము
మరువలేను నిన్ను మాతృమూర్తి

⁠ 63


ఆ.వె.⁠

అదను బట్టి మారునన్నదమ్ముల ప్రేమ
నడత బట్టి యుండు నాన్న ప్రేమ
అమ్మ నీదు ప్రేమ యాద్యంతముండును
మరువలేను నిన్ను మాతృమూర్తి

⁠ 64


ఆ.వె.⁠

అమ్మ నీదు ప్రేమ యాకాశమంతది
దయను చూపినావు ధరణి వోలె
క్షమను కొలవ బోవ కడలి సమానము
మరువలేను నిన్ను మాతృమూర్తి

⁠ 65

​

ఆ.వె.⁠

ముదిమి మీద పడిన మోము ముడతలైన
తల్లి నీదు ప్రేమ తరగి పోని
దెల్లలేనిదమ్మ తల్లి నీదు ఋణము
మరువలేను నిన్ను మాతృమూర్తి

⁠ 66


ఆ.వె.⁠

 రాజు రాజ్యమైన రాజభోగాలైన
భువిని సంపదైన దివిజులైన
నమ్మ కన్న గొప్పయంశములవికావు
మరువలేను నిన్ను మాతృమూర్తి

⁠ 67


ఆ.వె.⁠

కోట్ల యాస్తి కన్న నోట్ల కట్టల కన్న
పట్టు బట్ట కన్న పైడి కన్న
నవని మెప్పు కన్న నమ్మ సేవయె మిన్న
మరువలేను నిన్ను మాతృమూర్తి

⁠ 68


ఆ.వె.⁠

అంతరంగమందునాత్మీయ ప్రేమను
కన్నతల్లి పంచు కచ్చితముగ
హాయిగొలుపు హృదయమమ్మను చూడగా
మరువలేను నిన్ను మాతృమూర్తి

⁠ 69


ఆ.వె.⁠

ఉర్వి కలిగి యున్న ఓర్పు నంత కలిపి
బొమ్మ నాడు చేసెనమ్మ సృష్టి
సహన మందు నీకు సాటివారెవ్వరు
మరువలేను నిన్ను మాతృమూర్తి

⁠ 70

​

ఆ.వె.⁠

కోటి దేవతలను కూడియాబ్రహ్మయే
నిన్ను తెచ్చినాడు నేలపైకి
అమ్మ యున్న చాలునవనియేనాకము
మరువలేను నిన్ను మాతృమూర్తి

⁠ 71


ఆ.వె.⁠

తల్లి నిన్ను మించు తత్త్వంబు లేదమ్మ
తల్లి యొడిని మించు తలము లేదు
తల్లి నిన్ను మించు దైవంబు లేదమ్మ
మరువలేను నిన్ను మాతృమూర్తి

⁠ 72


ఆ.వె.⁠

ఆకులెండి పిదప నవనిపై రాలును
ఫలము పండి పిదప పగిలిపోవు
అమ్మ నీదు ప్రేమకంతమే లేదమ్మ.
మరువలేను నిన్ను మాతృమూర్తి

⁠ 73


ఆ.వె.⁠

తల్లి కన్నదైన తల్లి పెంచినదైన
ఉల్లమందు ప్రేమ తల్లికుండు
తల్లి తల్లి యెగద ధరణి పైన నెపుడు
మరువలేను నిన్ను మాతృమూర్తి

⁠ 74


ఆ.వె.⁠

కన్నతల్లి మనసు వెన్నవంటిదగును
పెంచినమ్మ కూడ ప్రేమ పంచు
అమ్మయెవరికైన నమ్మయేయౌగదా
మరువలేను నిన్ను మాతృమూర్తి

⁠ 75

​

ఆ.వె.⁠

మాతృమూర్తి యన్న మమకార నిధియగు
మాతృమూర్తి కల్గు మనసు మనసు
మాతృమూర్తి నీవె మమతల కోవెల
మరువలేను నిన్ను మాతృమూర్తి

⁠ 76


ఆ.వె.⁠

వింటి నీదు మాట చంటిబిడ్డయపుడు
కంటి నీదు రూపు కంటినిండ
కన్నతల్లి నీవె కరుణారసమయివి
మరువలేను నిన్ను మాతృమూర్తి

⁠ 77


ఆ.వె.⁠

వయసు మీద పడిన వణికిపోవుచునున్న
నాదు క్షేమము గరుణమున దలచి
అమ్మయనెడి మాటకర్ధాన్ని చాటితి
మరువలేను నిన్ను మాతృమూర్తి

⁠ 21++78


ఆ.వె.⁠

కాసులెన్నో పోసి కనకమ్ము కొన్నను
అమ్మసేవ కొలువ సొమ్ము కలదె
ధనము కంటె తల్లి ఘనము ధరణియందు
మరువలేను నిన్ను మాతృమూర్తి

⁠ 79


ఆ.వె.⁠

తల్లి సేవ చేయు తనయుడే తనయుడు
మాతృ సేవ చేయు మనిషి మనిషి
తల్లి నీదు సేవ తరగని భాగ్యమ్ము
మరువలేను నిన్ను మాతృమూర్తి

⁠ 80

​

ఆ.వె.⁠

అవని సంపదైననధికారమైనను
పూజ్యమైన ప్రభుని రాజ్యమైన
అమ్మతనము కన్ననత్యుత్తమము కాదు
మరువలేను నిన్ను మాతృమూర్తి

⁠ 81


ఆ.వె.⁠

అమ్మ మనసు విరిచి యమ్మనే మరిచిన
పుత్రుడధముడగును పుడమి పైన
అధముడైన గాని ప్రధముడందువు వాని
మరువలేను నిన్ను మాతృమూర్తి

⁠ 82


ఆ.వె.⁠

ఆపదెంతయైననవసరమేదైన
అమ్మ నీవెయున్న నభయమగును
అట్టియాత్మ శక్తియమ్మకే సాధ్యము
మరువలేను నిన్ను మాతృమూర్తి

⁠ 83


ఆ.వె.⁠

పుడమి భాషలన్ని వడకట్టి వెదకిన
జనని పదముకెపుడు సమము లేదు
అమ్మయనెడి మాట అమృతతుల్యమగును
మరువలేను నిన్ను మాతృమూర్తి

⁠ 84


ఆ.వె.⁠

అవనియందునీవె యనురాగదేవత
అలుపెరుగనియోర్పువమ్మ నీవు
నీదు ప్రేమ దొరుకు నీవద్ద మాత్రమే
మరువలేను నిన్ను మాతృమూర్తి

⁠ 85

​

ఆ.వె.⁠

వెతికి వెతికి కంటి ప్రేమ జాడ కొరకు
ఆర్తి తోడ తిరిగి యవనియంత
తెలుసుకొంటినిపుడు తల్లియే ప్రేమని
మరువలేను నిన్ను మాతృమూర్తి

⁠ 86


ఆ.వె.⁠

భక్తి ధార వోసి భగవంతుని కొలిచి
పూజ చేసి నేని పుణ్యమేది
అమ్మ పాద పూజ యందు ముక్తి దొరకు
మరువలేను నిన్ను మాతృమూర్తి

⁠ 86


ఆ.వె.⁠

పూజలెన్నొ చేసి పుణ్యమున్ బొందినా
దానధర్మములిడు దాతకైన
నీదు సేవ యిచ్చు నిజమైన ముక్తిని
మరువలేను నిన్ను మాతృమూర్తి

⁠ 88


ఆ.వె.⁠

ఆదిశక్తి పోయెనాత్రిమూర్తులు పుట్ట
తల్లి కోరునట్టి తనయు బ్రతుకు
త్యాగమంటె నీవె తల్లి జగతియందు
మరువలేను నిన్ను మాతృమూర్తి

⁠ 89


ఆ.వె.⁠

అమ్మలేదు కనుక హరుడు భిక్షమడిగె
గజపుతోలు తొడిగె గరళకంఠ
కన్న తల్లియున్న కడగండ్లు ముట్టునా?
మరువలేను నిన్ను మాతృమూర్తి

⁠ 90

​

ఆ.వె.⁠

హరునిబోలి యమ్మ యాహారమిచ్చును
హరిని బోలి యమ్మ సిరులు గూర్చు
నలువ వోలె యమ్మ నాకుజన్మంబిచ్చె
మరువలేను నిన్ను మాతృమూర్తి

⁠ 91


ఆ.వె.⁠

దైవసేవ చేయ దైవమిలను లేడు
తల్లి నీదు సేవ దైవసేవ
నీదు సేవయిచ్చు నిజమైన మోక్షము
మరువలేను నిన్ను మాతృమూర్తి

⁠ 92


ఆ.వె.⁠

మాతృమూర్తి చాలు మాణిక్యమెందుకు
అమ్మ నీవె చాలునాస్తులేల
కన్నతల్లి సేవ కానుకౌ ధరణిని
మరువలేను నిన్ను మాతృమూర్తి

⁠ 93


ఆ.వె.⁠

అమ్మసేవ చేయు హస్తము హస్తము
అమ్మపైన కల్గిననుగు ననుగు
తల్లిగూర్చి చేయు తర్కము తర్కము
మరువలేను నిన్ను మాతృమూర్తి

⁠ 94


ఆ.వె.⁠

మ్రొక్కి లాభమేమి ముక్కోటి సురులకు
మోక్ష సిద్ధి కొరకు దీక్షలేల
అమ్మ నీదు సేవ యందించు మోక్షమున్
మరువలేను నిన్ను మాతృమూర్తి

⁠ 95

​

ఆ.వె.⁠

ఆపదైన చోట యమ్మా, తనయులున్న
మాతృమూర్తి సుతుని మనికి గోరు
త్యాగరూపినీవు తల్లి ధరణియందు
మరువలేను నిన్ను మాతృమూర్తి

⁠ 96


ఆ.వె.⁠

వేయి మార్లు కాశి వెళ్లి వచ్చిన నేమి
వసుధ చుట్టు తిరిగి వచ్చెనేని
అమ్మ కిడిన జోత కవనిని సమమేది?
మరువలేను నిన్ను మాతృమూర్తి

⁠ 97


ఆ.వె.⁠

మాతృసేవ జేసి మాతౄణముందీర్చి
మహిని మెలగవలయు మాన్యమతిని
ఇట్టి బుద్ధినిచ్చి యింపార మది బ్రోచె
మరువలేను నిన్ను మాతృమూర్తి

⁠ 98


ఆ.వె.⁠

తాటిచెట్టు వోలె తనువెంతయెదిగినన్
పరులసేవ కొరకు పాటుపడెడి
బుద్ధి నాకు కలిగే భూమియంతను బూచు
మరువలేను నిన్ను మాతృమూర్తి

⁠ 99


ఆ.వె.⁠

పంచదార కన్న పట్టుతేనెయకన్న
తేటతెలుగుకన్న తీపి కన్న
నీదు పాదపద్మనిధియగు మధురంబు
మరువలేను నిన్ను మాతృమూర్తి

⁠ 100

​

ఆ.వె.⁠

సురుల గణము కన్న సురరాజు కన్నను
సృష్టికర్త కన్న సృష్టి కన్న
జన్మనిచ్చు నట్టి జనని నీవె ఘనము
మరువలేను నిన్ను మాతృమూర్తి

⁠ 101


ఆ.వె.⁠

తల్లి నన్ను పెంచె దయతోడ ప్రేమగా
ఉల్లమందునుండు తల్లి యట్టి
తల్లిపైన పద్యమల్లుట కష్టమా?
మరువలేను నిన్ను మాతృమూర్తి

⁠ 102


ఆ.వె.⁠

ఇంటిలోని చాకిరెంత యున్ననుగాని
కంటి నిండ కునుకు కానకుండ
కంటి రెప్పలవలె కాంచి పెంచితివీవు
మరువలేను నిన్ను మాతృమూర్తి

⁠ 103


ఆ.వె.⁠

సురులు పొందలేరు సుకవియందుకొనడు
వీరుడెంతయైన వీలుపడదు
అమ్మ గొప్ప తనములార్యులకిల లేవు
మరువలేను నిన్ను మాతృమూర్తి

⁠ 104


ఆ.వె.⁠

ఈశ్వరుండు తపమునెవ్వరి కోసము
ఆస్తి కొరకు గాదె యమ్మ కొరకు
ధన్యతనొనగూర్చు తల్లి జపము సుమ్మి
మరువలేను నిన్ను మాతృమూర్తి

⁠ 105

​

ఆ.వె.⁠

అమ్మఘనతనెరిగి యాలకాపరి కూడ
మోహినియయెనంట మోజు కలిగి
నీదు వెతలు తెలిసి నీరజాక్షుడదిరె
మరువలేను నిన్ను మాతృమూర్తి

⁠ 106


ఆ.వె.⁠

ఎవరు నచ్చకున్న నెవరు నొచ్చుకొనిన
తల్లి నీదు ప్రేమ తనయుడేను
ఈశ్వరీచ్ఛ నొందు నేకదంతుడె సుమ్మి
మరువలేను నిన్ను మాతృమూర్తి

⁠ 107


ఆ.వె.⁠

ఆకలయిన వేళ యాహారమడిగిన
పస్తులుండి యిచ్చి పాయసమ్ము
కుడిపి నావు నీవు - కడుపార నాకును
మరువలేను నిన్ను మాతృమూర్తి

⁠ 108

​<poem>గౌరవ అధ్యక్షులు మా గౌరవ సభ్య బృంద ఆశీస్సులతో గౌరవ సలహాదారులు : గౌరవ సభ్యులు:

శ్రీ జరజాపు ఈశ్వరరావు గారు డా॥ వి. గణేశ్వరరావు గారు శ్రీ వంగపండు రాజేంద్రప్రసాద్ మాస్టారు గారు శ్రీ మండవిల్లి వేంకటేశ్వరరావు గారు M శ్రీ ఆలవెల్లి వెంకట మాధవి గోకుల క్రిష్ణ గారు డా॥ ఆరిశెట్టి మోహనరావు గారు శ్రీ గంటా వెంకటరాజు గారు శ్రీ పట్నాల ఈశ్వరరావు గారు శ్రీ గుల్లిపల్లి రాజ్ పాల్ గారు శ్రీ సారిపాక రాంప్రసాద్ గారు, శ్రీ పోతుబరి లక్ష్మణరావ్ గారు శ్రీ యిండుపూరి వెంకటేశ్వరరావు గారు శ్రీ వెత్సా మల్లికార్జున్ గారు గౌరవ న్యాయసలహాదారు : శ్రీ వడ్డాది షణ్ముఖముత్యాలు గారు అధ్యక్షులు : కార్యదర్శి : శ్రీ జె.బి. తిరుమలాచార్యులు శ్రీ కిలపర్తి దాలినాయుడు సాలూరు సాహితీ మిత్ర బృందం సభ్యులు : శ్రీ చావలి శేషాద్రిసోమయాజులు గారు, శ్రీ ఆకుల గణపతి గారు, శ్రీ అయిక భాస్కరరావు గారు, శ్రీ సాహుకారి చంద్రశేఖర్ గారు, శ్రీ గొట్టాపు శ్రీనివాసరావు గారు, శ్రీ బొత్స హరి ప్రసాద్ గారు, శ్రీ జె.బి.డి. రాజు గారు, శ్రీ ఎమ్.వి. గౌరీశంకరరావుగారు, శ్రీ కరిబుగత సత్యనారాయణ గారు, శ్రీ సి.హెచ్. అప్పయ్యబాబు గారు, శ్రీమతి రావాడ కృష్ణకుమారి గారు, శ్రీమతి సాబెరా బేగం గారు ​ ​అభినందనలతో...... శ్రీ డోకల రాములు మాస్టారు గారు, విశ్రాంత ప్రధానోపాధ్యాయులు, బొబ్బిలి శ్రీ కేతిరెడ్డి క్రిష్ణమూర్తినాయుడు గారు, విశ్రాంత మండల విద్యాశాఖాధికారి, బొబ్బిలి శ్రీ బండారు త్రినాధ మాస్టారు గారు, ప్రధానోపాధ్యాయులు, సాలూరు శ్రీ కేతిరెడ్డి చంద్రశేఖర్రావు గారు, సాలూరు శ్రీ చుక్క సూర్యనారాయణ గారు, మిలట్రీ ఇంజినీరింగ్ సర్వీస్, రాముడువలస శ్రీ వైకుంఠపు వాసు గారు, అధినేత : శ్రీ సాయిరాం డయాగ్నోస్టిక్ సెంటర్, సాలూరు ఈ క్రింది వైద్య నిపుణులు ప్రతీ 2వ, 4వ శనివారములు మధ్యాహ్నం గం|| 2-00 ల నుండి సా|| 7-00 వరకు వైద్యసేవలందించుదురు. డా॥ వంగపండు నిర్మల M.D. (General Physician) D.M. (Neurology) Jipmer జనరల్ ఫిజీషయన్, మెదడు, వెన్నుముక, నరముల వ్యాధుల నిపుణులు ఈ క్రింది వైద్య నిపుణులు ప్రతీ ఆదివారం మధ్యాహ్నం 2 గంటల నుండి రాత్రి 7 గంటల వరకు వైద్య సేవలందించెదరు. డా॥ బూరి అనీల్కుమార్, M.S. (Ortho) ఎముకలు, కీళ్లు మరియు వెన్నుముక వైద్య నిపుణులు ఈ క్రింది వైద్య నిపుణులు ప్రతీ ఆదివారములు ఉ॥ 10 గం॥ నుండి మ॥ 2 గంట వరకు వైద్య సేవలందించెదరు. డా॥ జాగారపు రమేష్ M.B.B.S., M.D. (Neuro Psychiatry) NIMHANS Senior Resident in GHMC (KGH) | మా వద్ద పరీక్షలు నిర్వహించు ఆధునిక పరికరాలు సెల్ కౌంటర్, సెమీ ఆటో ఎనలైజర్, Q.B.C. (క్యౌ.బి.సి.) TE.C.G., 100 ఎక్స్ -రే మిషన్ మరియు కంప్యూటరైజ్డ్ రిపోర్టులు కష్టమర్లకు సకాలంలో అందించగలము. | 24 గంటలు సర్వీసులు అందించబడును. ఇంటివద్దకు వచ్చి శాంపిల్ తీసి రిపోర్టులు అందించబడును. శ్రీ సాయిరాం డయాగ్నోస్టిక్ సెంటర్ K.S.M. బట్టలషాపు ఎదురుగా, మెయిన్ రోడ్, సాలూరు, Cell: 9866321374, 8096267992, do 08964 242020 36

Scanned with OKEN Scanner ​పుట:Matrumurthi padya sathakam.pdf/38 ​