పుట:Shriiranga-mahattvamu.pdf/322

వికీసోర్స్ నుండి
ఈ పుట అచ్చుదిద్దబడ్డది

శ్రీరంగమహత్త్వము

163


గాంతుఁ, గాంతాసమన్వితుఁ గనియె నొక్క
దివ్యపురుషునిఁ గావేరితీరమునను.

64


మ.

కని శ్రీరంగమునన్ భుజంగమసురంగద్భోగశయ్యాతలం
బునఁ దా నప్పుడు చూచునట్టి హరి యొప్పుం దేజమున్ మూర్తి చొ
ప్పును శృంగారవిలాసభంగులు, నెపంబుల్ వేరులే కమ్మహా
త్మునియొండొక్కటఁ గానఁగాఁబడిన నుద్భూతాద్భుతస్వాంతుఁడై.

65


క.

ఇటఁ జూచితి వెడలితి, మఱి
యెటుజన కదెవచ్చి కంటి నీలోనన, తా
నెటనుండి వచ్చెనొకొ యి
చ్చటి కప్పరమేశుఁ డనుచు సంశయమతియై.

66


ఆ.

కదియఁ బోయి నిజముగా విలోకించెదఁ
గాక యనుచుఁ గౌతుకమున జేరి
పరగుఁ దత్ప్రభావపరిమోహితాత్ముఁడై
యెఱుఁగలేక మఱియు మఱియుఁ జూచి.

67


క.

కాఁ డితఁడు రంగవిభుఁడను,
వేఁడిమి మఱి యట్టివాఁడు వేఱొకఁ డనుచున్,
లేఁడను నిత్తెఱఁగున నవు
గాఁడని భావింపఁ గొలఁదిగాక జడుండై.

68


శా.

ఆందోళించుచు నివ్వెఱన్ మునిఁగి చింతాక్రాంతుఁడై నిల్చినన్,
మందస్మేరముఖారవిందుఁ డగుచున్ లక్ష్మీశ్వరుం డాతప
స్విం, దేజోమహితుం, గృపాసహితుఁడై వీక్షించి, ధారాధరా
మందధ్వానగభీరవాక్యముల సన్మానంబుగా నిట్లనున్.

69


తే.

ఏమి చింతించుచున్నాఁడవో, మునీంద్ర?
నీమనంబున నది మాకు నిజముఁ జెప్పఁ
బొసఁగు నేనియుఁ జెప్పుము పొసఁగకున్న
నుండఁగానిమ్ము నీయందు నున్నపగిది.

70