పుట:Shriiranga-mahattvamu.pdf/156

శ్రీరంగమహత్త్వము

ప్రథమాశ్వాసము

⁠

శ్రీ మన్మూర్తిరుచుల్ తటిద్ద్యుతిఘనశ్రీ నామతింపన్ గటీ సీమన్ వామకరంబు సాఁచి వలచే శీర్షోపధానంబుగా రామం బైన ఫణీంద్రతల్పమున శ్రీరంగంబునం దాశ్రిత క్షేమస్థేమమతిన్ సుఖించుహరిఁ బూజింతున్ దయాంభోనిధిన్.

⁠ 1

మ.⁠

శయనంబై యుపధానమై నిలయమై సచ్ఛత్రమై పాదుకా ద్వయమై మంగళపీఠమై మృదులవస్త్రంబై సమస్తోచిత క్రియలం జక్రికి నిత్యసన్నిహితమూర్తిం బొల్చుశేషాహి న క్షయమేధానిధిఁ గావ్యలక్షణకళాచార్యున్ బ్రశంసించెదన్.

⁠ 2

ఉ.⁠

ఆయతచండతుండనిహతాహినికాయునిఁ, దప్తహాటక చ్ఛాయుని, సర్వవేదమయసన్నుతకాయుని, దేవదానవా జేయుని, నప్రమేయుని, నశేషవిహంగకులాధిపత్యధౌ రేయునిఁ బ్రస్తుతించు సుచరిత్రవిధేయుని వైనతేయునిన్.

⁠ 3

క.⁠

శ్రీరమణచరణసేవా చారనిరూధావధాను సత్కీర్తిజయ శ్రీరాజమాను, దానవ వీరఖగశ్యేనుఁ దలతు విష్వక్సేనున్.

⁠ 4

మ.⁠

వినుతింతున్ హరిభక్తిపెంపున జగద్విఖ్యాతులై పుణ్యకీ ర్తను లైనట్టి పరాశరుం గపిలు వేదవ్యాసు బ్రహ్లాదు న ర్జును, రుక్మాంగదు, నంబరీషుని, వసిష్ఠుం, బుండరీకున్, మరు త్తనయున్, భీష్ము, విభీషణున్, సురమునిం, దాల్భ్యున్, శుకున్, శౌనకున్.

⁠ 5