శ్రీరస్తు
సత్య హరిశ్చంద్రీయము
పంచమాంకము
(సతీసుతులతో హరిశ్చంద్రుడు నక్షత్రకుఁడు బ్రవేశించుచున్నారు)
హరి - దేవీ కష్టము లెట్లున్నను, బుణ్యక్షేత్రమైన వారణాశిం దర్శించితిమి. చూడు,
గీ. భక్తయోగ పదన్యాసి వారణాసి
భవదురిత శాత్రవఖరాసి వారణాసి
స్వర్ణదీ తటసంభాసి వారణాసి
పావనక్షేత్రముల వాసి వారణాసి.
నక్షత్రకా! విశ్వేశ్వరుని దర్శించి వత్తము. దేవీ! రమ్ము.
నక్ష - ఇఁక మాయప్పుమాట నీకు దోచదు, పద. (నడచుచున్నారు)
(యవనిక నెత్తఁగా దేవాలయము కాన్పించును. అందఱు విశ్వేశ్వరునకు నమస్కరింతురు)
హరి - (ప్రాంజలియై)
శ్లో॥ ప్రభుస్త్వం దీనానాం ఖలు పరమబంధుః పశుపతే!
ప్రముఖ్యోఽహం తేషామపి కిముత బంధుత్వ మనయోః
త్వయైన క్షంతవ్యా శ్శివ మదపరాధాశ్చ సకలాః
ప్రయత్నా త్కర్తవ్యం మదవన మియం బంధుసరణి.
శా. ఆపద్బంధుఁడ వీవు సామివి గదా! మాలాటి యాపన్నులం
దేపారన్‌ ప్రముఖుండఁగా మనకుం దండ్రీ? బాంధవం బింక వే
ఱే పల్కం బనిలేదుఁ గాననిఁక నీవే సైఁచి నా నేరముల్‌
కాపాడం దగు నెట్టులైనఁ నిటులే కాయోగ్యబంధుత్వముల్‌.
నక్ష - హరిశ్చంద్రా! ఇంకనెంతకాల మిట్లు ముక్కు పట్టుకొని కూర్చుండెదవు? రమ్ము.
