క. ఆయతమతి నుతసప్తో
పాయంబులు దెలియవలయుఁ బతి సామము భే
దాయతి దానము దండము
మాయోపేక్షేంద్రజాలమార్గము లెల్లన్. 184
కుమారసంభవము
క. భువి నాన్వీక్షకి మిళితా
ర్థవిదుండై దండనీతిఁ ద్రయి యనువిద్యం
బ్రవణుఁడయి వార్త లోక
వ్యవహారము సూచి యెఱుఁగవలయుం బతికిన్. 185
పురుషార్థసారము
గీ. రాజు వార్త సకలపరిరక్షణంబు
సేయకుండిన లోకము జీవశవము
అట్టిజగదేకరక్షణ మాచరించు
మానవేంద్రుఁ డనన్యసామాన్యుఁ డరయ. 186
కామందకము
క. విద్యాచతుష్టయం బన
పద్యచతుర్వర్గఫలము వసుధేశునకున్
హృద్యచతుష్షష్టికళా
విద్యలు రాజ్యాపభోగవిహితఫలంబుల్. 187
పురుషార్థసారము
క. వరనాయకుండు మధుకర
పరభృతకలహంసబర్హిపన్నగబకసూ
కరకంకసముత్కరముల
చరితంబులఁ దెలియవలయు జననుతచరితా. 188
మార్కండేయము
గీ. వ్యయము నార్జవంబు దయయు హింసయు బొంకు
నిజముఁ దియ్యఁదనము నిష్ఠురంబుఁ
బలువు రిష్టజనులు గలిగి యారయఁ బణ్య
రమణివోలె నుండు రాజనీతి. 189
పంచతంత్రి
క. ఎందును నాయాసమునకుఁ
బంద యయినవాఁడు సిరికి బాత్రుం డగునే
మందరగిరి మోవఁడె గో
విందుఁడు మును లచ్చికొఱకు విబుధు లెఱుంగన్. 190
నీతిభూషణము
క. బలిమియుఁ గలిమియుఁ గలిగిన
నలఘుమతీ తెగువవలయు నవనీశునకున్
దలపోసి చూడవలదా
బలవాచాపృథివి భూమిపాలుర కెల్లన్. 191
క. వసుధాధీశుఁడు దుర్దయ
గసమస చెడు ఖడ్గ ముడుగఁ గార్యము సెడుఁ దా
విసుగు సిరి వీరభోజ్యా
వసుంధరా యను పురాణవచనము వినవే. 192
చాటువు
