క. పిలువక నగరు సొరంగను
వలవదు నిచ్చలును వచ్చువారి సదాభ్య
స్తులనైన బిట్టు సొరనీ
వలవ దనవసరమునందు వాఁకిటికాఁపుల్. 166
పురుషార్థసారము
క. కొలు వీఁదగువేళయె లో
నిలువందగు నవసరంబు నియమింపక రా
జిలు వెడలమి ప్రజ విన్నప
ములు లేకున్నను నశించిపోవును దానున్. 167
నీతిసారము
క. వలయునమాత్యులు చుట్టం
బులు మూలబలంబు రాజపుత్త్రులు విద్వాం
సులు బలసియుండ నిచ్చలు
కొలువుండుదె లోకమెల్లఁ గొలువఁగ నిన్నున్. 168
సభాపర్వము
క. కొలు విమ్ము మాపకడ యో
ధుల కెల్లను సంధ్యయొద్ద దూతలనుం జా
రుల సంభావింపుము రా
త్రులఁ గాంతాభోగతత్పరుఁడ వగుము నృపా. 169
ధృతరాష్ట్రనీతి
గీ. వెనుకదెస నిల్చి కామినీవితతి గొల్వ
దక్షిణంబున సుకవివితాన మమర
వామదిశయందుఁ బొగడెడి వందిజనులు
నెదురు గాయకగేయంబు లింపుఁబెంప. 170
ముద్రామాత్యము
క. పరిజనులు సుమతులైనను
ధరణీశుఁడు కుమతి యయ్యుఁ దాప యయిచనున్
బరిజనులు కుమతులైనను
ధరణీశుఁడు సుమతియైనఁ దా వెలయఁ డిలన్. 171
పంచతంత్రి
క. క్షితిజనులకుఁ బరిజనులకు
సతతము ప్రెగ్గడనె చూపఁ జనదు ధరిత్రీ
పతి ప్రెగ్గడయై ప్రెగ్గడఁ
బ్రతిహస్తునిఁ జేయవలయు బద్దెనరేంద్రా. 172
క. ధనధాన్యవాహనములెడఁ
జన వీఁదగుఁగాని యెట్టిచనవరికైనన్
వనితలయెడ భూప్రజయెడఁ
జనవిచ్చుట బుద్ధిగాదు జనపాలునకున్. 173
క. నృపరాజ్యాంగములం దొక
విపరీతాంగంబ రాజ్యవిభవముఁ జెఱుచున్
నృపమంత్రులకును భేదము
చపలస్థితినొదవ సకలజగముం బొలియున్. 174
బద్దెననీతి
