ఈ పుట అచ్చుదిద్దబడ్డది
వ. అను కీరవాణుల కడ్డంబు వచ్చి మధురవాణియగు నొక్క విరిబోణి మధుపవేణి యగు దొరసానిం జూచి నెఱజాణతనంబునం దల యూఁచి చెయి సాంచి సమయోచితంబుగా నిట్లనియె. 53
క. నిన్నెఱుఁగు నెదిరి నెఱుఁగును
దన్నుం దన మట్టు నెఱుఁగు దామోదరుఁ డా
కన్నియకై నిను వేడె న
టన్నన్ మఱి శౌరి, నగరె యహహా జనముల్. 54
గీ. తగరు కొండమీఁద దాఁకఁగోరిన దారి
నెదిరిఁ దన్నుఁ దెలియ కింత పలికె
నింత మీను వచ్చి యెంత మీనును మ్రింగె
నువిదబుద్ధి వెనుక నుండుఁ గాదె. 55
గీ. కుట్టఁ దేలు; కుట్టకున్నఁ గుమ్మరబూచి
త్రోసిరా జటంచుఁ జేసెఁ జెలియ
దాని వ్రేలు దీసి దాని కన్ను వొడిచి
నట్లు సేయకున్న నడుగ రమ్మ. 56
క. మును నీ విచ్చిన చనువున
నిను నిట్టుల దూలనాడెనేని న్వినుమా
తన యింటి దీపమం చని
కని ముద్దులు వెట్ట మూతి కాలకపోనే. 57
