పుట:Prabandha-Ratnaavali.pdf/150

గొలువ నొప్పుజగత్పతిఁ గొలుతు నిన్ను
నఖిలభూతాత్మ! యాదినారాయణాత్మ! (ఆం) 391

ఉ. పూర్వకవీంద్రులం గొలుచుపూనికి నిప్పటివారిఁ గొల్తు ని
ర్గర్వత నిక్కవీంద్రులు పురాణకవీంద్రులకంటెఁ దక్కువే?
యుర్విని నేఁటివారగుట యొచ్చెమె? నేఁడును దామ్రపర్ణిలోఁ
బూర్వపుముత్తియంబులను బోలిన మౌక్తికరాజి లేదొకో? (జ) 392

ఉ. భారవిఁ గాళిదాసు శివభద్రుని మాఘుని బాణు భామహుం
జోరు మయూరునిం దలఁచుచున్ మఱియుం గవులౌ విదగ్ధు లె
వ్వారలు వారినెల్ల ననవద్యుల నాద్యులఁ బ్రస్తుతింతు సం
సార సుఖైకసార విలసత్కవితా వర వైభవార్థినై. (ఆం) 393

చ. మదమును మందెమేలమును మందటయుం దమకంబు వేడ్కయుం
గుదిగొనియున్న జవ్వనపుఁ గొమ్మలకాంక్ష యెఱింగి యెంతయున్
బ్రిదులని కౌఁగిలింతలను బింకపుఁ గ్రీడ నఖక్షతాదులన్
మదనగురుండనంగ సుఖమర్మములం దనిపెం బ్రవీణుఁడై. (ఆం) 394

సీ. మేరురోహణముఖ భూరిమహాశైల కులజనకాయిత గోపురంబు,
సోమసూర్యాద్యనానా మహస్సముదయ జననీభవద్వప్ర చక్రశతము,
అభ్రగంగాయమునాది ప్రవాహ సం ఘాత ధాత్రీభూతకేతనంబు,
సౌదామనీశక్రచాపపురస్సర ద్యుతిదేశికాయిత తోరణంబు,
గీ. నిఖిలపాతాళపాతాళ నిమ్నపరిఖ
మూర్ధ్వలోకోర్ధ్వలోకాయితోచ్చ సౌధ
మసదృశానేక శుభవిభవాస్పదంబు
పుణ్యసులభంబు వైకుంఠపురవరంబు. (ఆం) 395

సీ. రాగంబులగు శుద్ధరాగ సాళగరాగ సంకీర్ణరాగముల్ చక్కఁ దీర్చి,
స్త్రీ పు న్నపుంసక రూపంబులను వాని వేళలు మైత్రియు వెలయఁజూపి,
తాన ప్రపంచవిస్తారంబు చూపుచోఁ గ్రొత్తతానంబులు గొసరి కొసరి
స్వరమూర్ఛనా గ్రామజాతి శ్రుతుల లక్ష ణములకు నపుడు లక్ష్యములుగ[?]
గీ. ......లింపు లొదవంగఁదగిన శుద్ధ
దేశమార్గములను రాణఁ దేటపడఁగ