గీ. జెమటఁ గరఁగినతిలకము సెదరఁ గురులు
గలఁగ వదనము విరిదమ్మిచెలువుఁ దెగడ
మదనసమ్మానమందలి మగతనమున
మెఱయు గోపాంగనల పొందు మెచ్చె శౌరి. (ఆం) 382
మ. కరఢక్కారవవాద్య మింపొదవ గంగాతుంగ రంగత్తరం
గ రవప్రస్ఫుటతాళసమ్మిళిత తత్కంజాతపుంజస్ఫుర
ద్వరపుష్పంధయ మంథరధ్వనులు గీతంబొప్పఁ దౌర్యత్రికం
బిరవై యుండఁగ నీదు తాండవ మహం బేపారు సర్వేశ్వరా! (ఆం) 383
ఉ. కాటుక చేతులున్ మొగము గాఁ బులుమాడుచుఁ దల్పవస్త్రముల్
చీటికిమాటికిం దరలి చిందఱవందఱచేసి యాడుచున్
మీట నదల్ప నేడ్చుచును మెత్తనిమాటల బుజ్జగించి ము
ద్దాటకుఁ జొచ్చినన్ నగుచు నట్లమరెన్ హరి శైశవంబునన్. (జ) 384
సీ. చనుఁగవఁ బయ్యెద జాఱంగ జాఱంగఁ గరమూలమున నంటఁ గదిమి కదిమి,
వేనలి వెడవెడ వీడంగ వీడంగ నెలమి మూఁపునఁ జాల నిఱికి యిఱికి
నుదుటిపై నలకలు సెదరంగఁ జెదరంగ నల్లని ముంజేత నదిమి యదిమి
పొడతెంచు చెమటలు పొదలంగఁ బొదలంగ నడరు నూర్పులచేత నడఁచి యడఁచి
గీ. చన్నులును జేతికలశంబు సరసమాడ
నవ్వు నమృతంబుఁ దమలోన నవ్వులాడ
సిగ్గు తమకంబు వినయంబుఁ జెంగలింప
వెలఁది యమృతము వడ్డించె విబుధతతికి. (జ) 385
[గూఢచతుర్థి]
సీ. చూడ్కి మోమున నాభి సువిహార యోగ్యత వలరాజుబావి జావళము సేసి,
యెలయింత బొమల మై మెలఁకువ మాటల మరువింటి రసము లేఁబరము సేసి,
కళలఁ దనుప్రభ గతి నటనంబున శారదమెఱుఁగు గజంబు గెలిచి,
యెలమి నవ్వునఁ గుచముల నిటలంబున మొలకవెన్నెలమొగ్గ ముంపు దింపి,
గీ. పలుగ నేర్చిన రత్నంపుఁబ్రతిమలనఁగఁ
దిరుగ నేర్చిన వెన్నెల తీఁగెలనఁగఁ
