పుట:Prabandha-Ratnaavali.pdf/138

వికీసోర్స్ నుండి
ఈ పుట అచ్చుదిద్దబడ్డది

ప్రబంధరత్నావళి 71

సీ. సంతతి లేని సంసారంబు నిస్సార మొగి నర్భకులు లేని యొప్పు తప్పు
కొడుకుతోఁ గూడని కూడు గీడు తనూజు లెపుడు క్రీడింపని యిల్లు పొల్లు
పుత్త్రరత్నము లేని భోగంబు రోగంబు తనయుఁ గానని దాని తగవు నగవు
పిన్నబిడ్డలు లేని పెక్కువ తక్కువ సూను మైసోఁకని మేను మ్రాను
తే. కాన యెబ్భంగినైన సంతానలబ్ధి
కాననగు త్రోవఁ బరికించి కానవలయుఁ
గాని యూరక యున్కి యుక్తంబు కాదు
జగతి సంతతి లేకున్న జన్మహాని. (జ) 334

సీ. సురవాహినీ హేమసరసిజమ్ములు గోయ జను లర్థి నిడిన నిచ్చెన లనంగ
నభ్రంబు పాథోధి యనుచు నెఁగఁగ నిల్చి సాగిన శరదభ్రచయము లనఁగ
జవభిన్నరవిరథాశ్వములు నిల్వఁగ నోలిఁ బన్నిన పటికంపుఁ దిన్నె లనఁగ
ఘనరత్నకుట్టిమోద్గతరసాతలశేష ఫణిఫణాద్యుతికలాపంబు లనఁగ
గీ. భూమి కాంచిత నవమణిస్తోమ ధామ
మండలాఖండలాచ్ఛకోదండఖండ
పటల నర్తిత దేహళీబర్హికులము
లగుచు నప్పురి సౌధంబు లతిశయిల్లె. (జ) 335

సీ. సౌవీర మగధ కోసల భోసల పుళింద లాట కేరళ మహాభోట చోట
సాముద్ర పౌండ్ర ఘూర్జర కుంత లావంతి పాండ్య గాంధార నేపాళ గౌళ
కర్ణాటక కురు కేకయ వత్స మత్స్యాంగ బంగాళ సింధు కళింగ వంగ
కురు బాహ్లికా[?]ది కొంకణ టెంకణ సాళ్వ కాశ్మీర పాంచాళ చోళ
గీ. శక సుధేష్ణ త్రిగర్త దశార్ణ వార్ణ
కాల కాంభోజ దరద కంథాణ హూణ
సింహలోత్కళ బహుధాన శూరసేన
యవన మద్ర మరుద్రదేశాంధ్రవిభులు. (జ) 336

క. హరితురగము నరుణాంశుని
హరులుం గవగూడెనేని యగు సరి లేదా
సరి గావని యితర హయో
త్కరములనగు నప్పురమునఁ గల హరులెల్లన్. (జ) 337