పుట:PadabhamdhaParijathamu.djvu/824

వికీసోర్స్ నుండి
ఈ పుట అచ్చుదిద్దబడ్డది

చేతు - చేతు 798 చేతు - చేతు

చేతుల కసి పోవగా

  • చేతుల కసి దీరునట్లు, చేతుల నిండా (యుద్ధము చేయు.)
  • "చేతులకసి వోవంగ న,రాతులు బెగ్గి లఁగఁ గ్రీడి ప్రకటస్ఫురణన్." భార. కర్ణ. 2. 300
  • "చేతులకసి వోఁ గయ్యము, చేత వినిన యట్టివిధము చింతించి ననున్." ఉ. హరి. 5. 22.

చేతులకసి వోవునట్లు

  • చేతులకసి తీరునట్లుగా.
  • "వీరు వా రనక వీరావేశంబునం జేతుల కసి వోవం జెలఁరేగి సింహనాదంబులు సేయుచు మోఁదువారును." ఉ. హరి. 4. 229.

చేతుల కాటి నిల్చు

  • ఎదిరించి నిలువ గలుగు.
  • "......ఏమియున్, డయ్యక కొంతసేపు పెనుఢాకను జేతుల కాటి నిల్చువాఁ, డెయ్యెడఁ బోటుబంటునకు నెంతయుఁ గౌతుకకారి కాఁడె." ప్ర. 2. 58.

చేతుల తీట

  • భుజకండూతి, యుద్ధేచ్ఛ.
  • "చెనసి కలహభీతి చేతుల తీట వోఁ, బొడువఁ జాలునేని..." కుమా. 10. 144.
  • "చేతుల, తీఁట నిలుపరాక త్రిభువనముల రేపు, చున్నవాఁడు." కుమా. 11. 103.

చేతుల చఱచు

  • చేతులతో కొట్టు.
  • "ఇరువుర మీఁదన్, జెచ్చెరఁ జేతులఁ జఱచుచు, వచ్చెను గద! దూ ఱటంచు వనరుచుఁ దమలోన్." ఉషా. 3. 57.

చేతులను తేల్చు

  • చేతులు కడుగుకొను.
  • "కర్కరికాముఖాగ్ర, గళితగంధోదకంబులఁ గంసవైరి, చేతులను దేల్చె బాంధవశ్రేణితోడ." పారి. 2. 20.

చేతుల బట్టు

  • చేర దీయు.
  • "సీతఁ గానఁగ లేక చేరిన నన్నుఁ, జేతులఁ బట్టక చెదరఁ ద్రోలుదురు." వర. రా. కిష్కి. పు. 490. పంక్తి. 16.

చేతుల లావు

  • భుజబలము
  • "వీఁడు నీ చేతులలా వెఱుంగఁడు." భార. ద్రోణ. 183.

చేతులవ్రేళ్ల మడచికొనుచు నేడ్చు

  • ఏడ్చుటలో ఏమీ చేయలేక పోవుట సూచిస్తూ చేయు చేష్ట.
  • "మార్చి మార్చి చేతుల వ్రేళ్ల మడఁచి కొనుచు, నింక నెట్లమ్మ యంచు నయ్యింతు లేడ్వ." ఉ. హరి. 5. 276.

చేతు లాడించుకొంటూ

  • పని కాక (తిరిగి వచ్చు.)
  • "ఆ నీ కొడుకు వెళ్ళ కేం? వెళ్లాడు. చేతు లాడించుకొంటూ వచ్చాడు." వా.
  • రూ. చేతు లూగించుకుంటూ.

చేతులార

  • తనివి తీరా, చేతులకు సంతృప్తిగా.