76.
నా రెండుకళ్ళకి వరమైన నీ సోయగం
ఇంద్రుని వేయికళ్ళకి సైతం దక్కని మహార్భాగ్యం
77.
కన్నుకీ కన్నుకీ గమ్మత్తైన పోటీ
నిన్నెవరు ముందు చూస్తారో...అని
78.
అన్నులమిన్న కన్నులు పన్నేవి వలపువలలు
కనుపాపలలో బంధిస్తూ... కదలనీయని పద్మవ్యూహాలు
79.
మధురక్షణం వద్దే ఆగిపోనీ కాలాన్ని
మరో చేదుజ్ఞాపకం తలుపు తట్టకుండ
80.
నిశిలో నిద్రిస్తోంది ప్రతి రేయి హాయిగా
మదిలో నీ జ్ఞాపకాలనెగళ్ళు అవిశ్రాంతంగా మండుతున్నా
81.
తారలన్నీ మిలమిలలతో వేస్తాయి శశాంకునికి 'వల'
చందమామ దాగేది వయ్యారి వెన్నెలమ్మ కొంగుకా'వల'
82.
నమ్ము'కొని' శిశిరంలో నీ కౌగిళ్ళనెగళ్ళని
విసిరేసాను ఉన్న అన్నిఉన్నికంబళ్ళని
83.
తీరంలా 'అల'జడితో నేను
సాగరకేంద్రంలా ప్రశాంతంగా నీవు
84.
నీ చింతన మానలేని బలహీనత నాది
నాచింతని దూరం చేయలేని అసహాయత నీది
85.
నిన్నటిదాకా గతమనిపించిన
శిశిరంనేడెందుకో వర్తమానమై భయపెడుతూ
మణి మాలికలు జ శ్రీనివాస్ ఆర్.వీ.ఎస్.ఎస్
151