ఈ పుట అచ్చుదిద్దబడ్డది
278
వెలసెఁగా భవదీయకవిత్వ గరిమ
వంద్యమై సోదరకవీంద్ర వర్యులార
ఇచ్చినారు నృపాలు రెన్నేని బిరుదముల్
మెచ్చినారు కవీంద్రులిచ్చతోడ
పెచ్చినారు గ్రహించి వేనూటపదియార్లు
హెచ్చినారు సమాను లెవ్వరనఁగ
వచ్చినారు విరోధివర్గంబు నెల్లను
ద్రచ్చినారు సమస్తగ్రంథములను
తెచ్చినారు సుకీర్తి దేశంబునకునింత
వచ్చినారిపుడు కన్పండువుగను
గాంచినాఁడను మిము, సంతసించినాఁడ
భవదఖండాశుకవితా ప్రభావమనుప
మేయమని పొంగినాఁడ నమేయ కీర్తి
విభవులార! కొప్పరపుకవివరులార!
కొప్పరపువారి కవనము
కప్పురపుంబలుకులట్లు గనిపించె బలే
యిప్పగిదిఁ జెప్పనొప్పునే
యొప్పుగ నెవ్వారి కేని నుర్వీస్థలిలోన్
చెలఁగ గంజామువారింట సీతపెండ్లి
లీల భీష్మజననముఁ గాలేజిలోన
ఠీవిమీఱు బ్రహ్మానందరావుగారి
భవనమున నభిమన్యు కంసవధలనెడు
కధలఁ జెప్పిరి సోదరకవులు భళిర!
