పుట:Kopparapu-soodara-kavula-kavitvamu.pdf/128

వికీసోర్స్ నుండి
ఈ పుట అచ్చుదిద్దబడ్డది

87

49. భరతఖండము కామధేనువుతోఁ బోల్చుట

షడ్రసోపేత భోజనసౌఖ్యములొసంగ
         నీరెండు సమతచే నింపుఁగాంచు
నవరత్నములు సమున్నత శక్తినీనంగ
         నీరెండు సమతచే నింపుఁగాంచుఁ
జిత్రాంబరంబులు చెలువారఁగనొసంగ
         నీరెండు సమతచే నింపుఁగాంచు
గామ్యార్థములనెల్ల గరిమతోనొసఁగంగ
         నీరెండు సమతచే నింపుఁగాంచు

భరతఖండంబుసుమియిది ప్రణుతిసేయ
గామధేనువుసుమ్మది గణుతిసేయ
నిట్టియీరెంటిసామర్ధ్య మెవ్వఁడేని
వర్ణన మొనర్పకున్న శోభనముగలదె

50. కోతుల యుపయోగము

స్వామికార్యౌఘ నిర్వహణప్రవీణత
         నుజ్జ్వలస్థితి గాంచె నొక్క కోఁతి
మున్నీటి పైఁగొండ లెన్నింటినో తేల్చి
         యుజ్జ్వలస్థితిగాంచె నొక్కకోఁతి
మరణమందినవారి మఱలంగబ్రతికించి
         యుజ్జ్వల స్థితిగాంచె నొక్కకోఁతి
శ్రీరామకల్యాణ సిద్ధి దైవారంగ
         నుజ్జ్వలస్థితిగాంచె నొక్కకోఁతి

యిట్లుగా వర్ణనముసేయ నింతవఱకు
నెన్నియో కోఁతులున్నవి మన్ననమునఁ