మీనా- కనిష్టీబుమాట తెలిసిందో ?
రామ- తెలిసింది.
మీనా- యవరు చెప్పారు ?
రామ- అసిరిగాడు.
మీనా- మా అసిరిగాడా ?
రామ- మీ అసిరిగాడే.
(అసిరిగాడు వీధితలుపు కొంచంతీసి తొంగిచూసి.)
అసి- దెయ్యానికెట్టింది తింతున్నావయ్యా?
రామ- దెయ్యానికా పెట్టారు ?
మీనా- (అసిరిగాడితో) వూరుకో వెధవా.
రామ- నీకు న్యాయవేఁనా, దిగదుడుపు కూడుపెట్టడం?
(వీధులోకి వెళ్లి వమనము చేసికొనుటకు ప్రయత్నముచేసి తిరిగీ ప్రవేశించి)
వమన వైఁందికాదు. యేం సాధనం ?
మీనా- దిగదుడుపుకాదంటే నమ్మరుకదా ?
రామ- మూకుళ్లో తగలేశావు ?
మీనా- దెయ్యం తిని సచ్చిందా, యేవిఁటి ?
రామ- ఆడవాళ్లు దారుణం మనుషులు!
మీనా- అసిరిగాడేంచెప్పాడు మధురవాణిమాట?
అసి- (తిరిగీ తొంగిచూచి) ఆ పారేసిందట్టుకు పోదునాబాబు ?
రామ- పట్టుకుపో.
(అసిరిగాడు పట్టుకుపోవును.)
మీనా- వాడికి మీకంటె ధైర్యంవుంది.
రామ- అపవిత్రం ముండాకొడుకు యేవైఁనా తింటాడు. బ్రాహ్మలం పవిత్రవైఁన వాళ్లంగదా?
మీనా- పవిత్రం అంటే, మీదీ, నాదే !
రామ- అదేం అలా అంటున్నావు ?
మీనా- నేను వెధవముండనీ, మీరు సరసులున్నూ. మనకంటే మరిపవిత్రం అయినవారు యవరుంటారు ?
రామ- ఆకళంకం తీసెయ్యడానికే యీవేళొచ్చాను.
మీనా- యలా తీసేస్తారు?
రామ- మన యిద్దరం పెళ్లాడితే మరి అపవిత్రత యెక్కడుంటుంది ?
మీనా- యేవిఁటీ !