పుట:Kankanamu020631mbp.pdf/29

వికీసోర్స్ నుండి
ఈ పుట ఆమోదించబడ్డది

గాలివానలోఁ గంకణము సాగరమునఁ బడుట

శా. నీరంధ్రాంబుధరవ్రజంబు, త్రిజగన్నిర్మూలనాఖేలనా
    పారీణానిలపాదతాడనములన్ బట్టూడి, బిట్టోడి, పె
    ల్లారాటంపడి, బింకమెల్లఁ జెడి, నీరై నాఁటిరేయింగటా!
    ప్రారంభించెమదేభతుండనిభధారాపాతముల్ ధాత్రికిన్.

చ. ప్రభువు ప్రకంపనుండయినరాజ్యము త్యాజ్యముగాన రండురం
   డభయముగల్గుదేశమున కభ్రములార! యటంచు శత్రుభూ
   పుభయము పెంపునన్ వలసపోయెడు తెంపునఁబోవఁ జొచ్చెని
   న్నభము దొలంగి మాఘనఘనాఘనముల్ మహికింగ్రమంబునన్.

ఉ. ఆలయకాల కాలనిభుడైన ప్రభంజను తాడవంబులన్
   జీలియు వ్రీలియున్ మివులఁ జిందరవందరయైన మాపయో
   దాలులనుండి నాఁడు కురియందొడఁగెన్ వడగండ్లుఁగూడఁగీ
   లాలముతోడి మాంసశకలమ్ములలీల నిలాతలమ్మునన్.

ఉ. కొన్ని వనంబులందు నొకకొన్నిసముద్రములందు నింకనుం
   గొన్నికొలంకులందు మఱికొన్ని మహానదులందు నీగతిన్
   గ్రన్ననఁగూలె నీలమణికాంతులనేలు పయోదమాలికల్
   మిన్నుదొలంగి దారుణసమీరణ మారణకారణంబునన్.