సౌజ : వాడు బతుకుతున్న వాడికి అపకారం చెయ్యడం పాపానికి కారణం. గనుక మా అన్నయ్యని యెంత కష్టపడి అయినా నేను కాపాడడం విధి అని యెరుగుదునండి. (కొత్తగా వచ్చిన మనిషితో) యెవరు మీరు? కొత్త మనిషి : జరూరు ప్రయోజనం కలిగి వచ్చానండి. వర్తమానం చేయకుండా వచ్చినందుకు క్షమించవలెను - కింద నౌఖర్లు కానరాలేదండి. సౌజ : రండి - కూచోండి. గిరీశ : (లేచి వెళ్ళి ఒక కుర్చీ తెచ్చి తన కుర్చీ పక్కను వేసి) దయచెయ్యండి. కొత్త మనిషి : (కూచోక) అక్కర్లేదు. సౌజ : కూచోండి (కొత్తమనిషి కూచొనును) తాము యెవరండి? కొత్త మనిషి : నేనెవరో మనవి చేయక తీరదా అండి? సౌజ : యే కారణం చేతనైనా పేరు చెప్పడం యిష్టం లేకపోతే, చెప్పనక్కర లేదండి. కొత్త మనిషి : నేవచ్చిన పనికి, నా పేరుతో పనిలేదండి. కొన్ని కారణములచేత నా పేరు చెప్పడముకు వీలు లేదండి. క్షమించవలెనని ప్రార్థన. గిరీ
- షెక్స్పియర్ అన్నాడు కాడా అండి “వాట్సినె నేమ్?” అని.
దానిని నేను చిన్న గీత ముక్కగా తర్జుమా చేశానండి. “పేరులోన నేమి పెన్నిధియున్నది” మన శాస్త్రాల్లో కూడా యెవరి పేరు వారు గట్టిగా ఉచ్చరించితే పాపవడన్నారు. తమకు విశదమే. కొత్త మనిషి : మరివొకరితో అయితే కల్పించి మారు పేరు చెప్పుదును. తమచోట అబద్ధం ఆడజాలనండి. గిరీ : భోజరాజు ముఖం చూస్తే కవిత్వం పుట్టినట్టు, తమ ముఖం చూస్తే యెట్టి వాడికైనా నిజవేఁ నోటంట వొస్తుందండి. కొత్త : ఒకానొకరికి తప్ప. గిరీ “సచేమాన్ ఈజ్ టుబి పిటీడ్” అనగా అట్టి మనిషి వుంటే ఆ మనిషి యెడల మనం కనికరం కలుగజేసుకోవాలి - అంతే. సౌజ : అసత్యవఁనేది యెవరితోనూ ఆడకూడదు. కొత్త : మంచివారి యెడల మంచిగానూ, చెడ్డవారి యెడల చెడ్డగానూ, వుండమని మా తల్లిగారు ఉపదేశం చేశారు. అంచేత తమతో అబద్ధవాఁడనన్నాను. గురుజాడలు కన్యాశుల్కము - మలికూర్పు . 409
