పుట:Geethamulu, basavaraju apparao (1934).pdf/78

వికీసోర్స్ నుండి
ఈ పుట ఆమోదించబడ్డది

దేవదత్తము

     చిలుకలు కొఱికిన పం డొక్కటి నా
          చేతుల బడె నో దేవా,

     తెలియు నెట్లు తీయనిదో విషమో
          తినకుండగ నో దేవా?

     త్రోవ బోవుచుండ దండవీడిన
          పూ వొకటి దొరికె నో దేవా

     తావి కమ్మనిదొ తలనొప్పిడునో
          యేవిధి తెలియును దేవా?

     ఱెక్కలు తెగినట్టి పిట్ట యొక్కటి
          అక్కున [1]గొంటిని దేవా

     ఎక్కరణిని [2]పెంచి బాగు జేసెదొ
         [3]నీకే వదలితి దేవా!

  1. బడెనో
  2. పెరిగి పెద్దదౌనో
  3. ఎవ్వరి కెఱుకో దేవా!