పుట:Chatupadhyamanimanjari - Veturi Prabhakar Sastry.pdf/76

వికీసోర్స్ నుండి
ఈ పుట అచ్చుదిద్దబడ్డది

మట్లవారు

ఉ. అక్కజ మొప్పఁగా భుజపరాక్రమశక్తుల నెంచిచూచినన్
    దిక్కులలోనఁ బోలిపలి తిమ్మయ బుక్కఁడు రాజు నాఁటికిన్
    మక్కువ దోర్బలంబునను మానవనాథులలోన నంతకు
    న్నెక్కువ మట్లకోనధరణీశ్వరు నెల్లమరాజు నేఁటికిన్.
ఉ. మాయురె! సద్గుణాభరణ! మల్లకుమారయనంత శౌర్యధౌ
    రేయుని నిన్ను నాజి నెదిరింపను శక్తులు గాక కైదువుల్
    వేయని రాజులున్ శరణు వేఁడని మన్నెకొమాళ్ళు కానికల్
    సేయని శూర్లు మ్రొక్కని వజీర్లును లేరు వసుంధరాస్థలిన్.
ఉ. వెండియు మట్లరాజు తిరువేంగళనాథుఁడు కందనోలికా
    భండనభూమిలోఁ దురకబారులపైఁ బడి సంహరింపఁగాఁ
    గండలు కొండలయ్యె నెముకల్ ధరణీజము లయ్యె నెత్తురుల్
    గందపుటేఱు లయ్యెఁ దలకాయలు తారక లయ్యెఁ జూడఁగన్.

అద్దంకి నృపాలురు

మ. పదవే రంభ! సురేంద్రుకొల్వునకు నప్పా! నాకు రాఁ దీరదే;
    యది యేమే; ధర మందపాటి రఘునాథాధీశుబాహాసిచేఁ
    గదనక్షోణిని నీల్గినట్టి రిపుసంఘాతంబు వే వచ్చెడున్
    వదిలే దెప్పుడు వచ్చుటెప్పుడు, చెలీ; వామాక్షి! వారెందఱే?
    బదులు న్నూఱులు వేలు లక్షలు గణింపన్ శక్యమే చెల్లెలా.
ఉ. ఇంద్రుని సన్నిధానమున కేఁగె రణోజ్జ్వలవిక్రమక్రియా
    సాంద్రుఁడు మందపాటికులసాగరచంద్రుఁడు రామభద్రరా
    జేంద్రుఁడు పార్థివాబ్దమున నేకతఁ గార్తికశుద్ధపూర్ణిమా
    చంద్రదినాంతమందు రవి జారినకైవడి మారుతాత్మజా!