పుట:Chandrika-Parinayamu.pdf/84

సీ. రాజచంద్రులు గాని రాజచంద్రులు గారు
తర మూన్ప నరిదానదానపటిమ,
నచలేశ్వరులు గాని యచలేశ్వరులు గారు
సరి సేయ ధృతిసంగసంగరముల,
నినకుమారులు గాని యినకుమారులు గారు
కదియింప రుచికాండకాండకలన,
గోపాత్మజులు గాని గోపాత్మజులు గారు
పాటి వాగనుభావభావగరిమ,

తే. ననుచు జగ మెన్నఁ బొగడొందు హారిమండ
లాగ్రఖండితరిపుమండలప్రవీర
కాండనిర్భిన్నమార్తాండమండలాంత
రుండు పెదమల్లనాయకాఖండలుండు. 36

ఉ. పూనిక బాలచాపలముఁ బొందు నిభప్రకరంబు, గుడ్లలోఁ
గూన బిలేశయాధిపుఁడు, గూర్మము సూడ శిరంబు నిల్ప లే,
దానగపాళియున్ నడవనైనను నేర దటంచు మేదినీ
మానిని సేరె నౌర పెదమల్లమహీను నహీనయౌవనున్. 37

శా. ఆమల్లక్షితినాథరత్నకరదీవ్యన్మండలాగ్రాంశుమ
ద్ధామస్థేమ రణాగ్రసీమ నరిగోత్రశ్రేణులం దూల్చు ను
ద్దామప్రౌఢిమఁ గేతువుం దునుము నుద్యత్పుండరీకంబులన్
భూమిన్ వ్రాల్చు సురాళి గన్గొనఁ బురాభూతేతరప్రక్రియన్. 38

తే. ఆ ధరాధిపుసతులు లింగాంబ, కొమ్మ
మాంబికయు, నలచిన్నలింగాంబ, వేంక
టాంబ, మల్లాంబ నా మించి రాత్మనాథ
సేవనాయత్తచిత్తతాస్థేమ, నందు. 39