పుట:Chandrika-Parinayamu.pdf/283

మ. సకిపై నానృపమౌళి నింప నలకంజాతాక్షి గోత్రాధినా
యకుపై నింపఁగ సేసఁబ్రా ల్దనరె సామ్యస్ఫూర్తి నవ్వేళఁ ద
త్సుకరాలంకృతినాదవాదములు దోడ్తో మించ సాహిత్యపో
షకుఁ డబ్జాస్త్రుఁడు దార్చునర్జునమణీజాలాభిషేకం బనన్. 70

మ. కపిలావాచనభద్రవేళఁ దగి రాకాంతావిభు ల్సేసము
త్తెపుచా ల్దార్కొనుమెట్టుఁబ్రాల్పుటిక లుద్దీపించు పెన్కాఁడితోఁ
దపనీయాంశుకసూనుసంభృతతులాత్మం బూన లావణ్యభా
గ్యపటుశ్రీసమరీతిఁ దెల్ప సరి దూఁగన్నిల్చుచందంబునన్. 71

చ. అలయినసన్మహస్స్ఫురణ నందుచు శ్యామయు నాకలాపినీ
కులతిలకోత్సవాకలనఁ గూడుచు నాహరివంశనాయకుం
డలరి యజస్రము న్వెలయ నయ్యెడ నంచితమంత్రశక్తిఁ ద
త్కలితకరాంబుజస్థలులఁ గట్టిరి కంకణము ల్ధరామరుల్. 72

చ. అలిచికురాసువర్ణవసనాంచలసంగ్రథితాంశుకాంతుఁడై
యలనరపాలమౌళి విమలాంబుజరాగవివాహపీఠికా
స్థలి వసియించి లాజసముదాయమున న్శిఖిహోమ మూన్చె ను
త్కలిక చెలంగ భూసురవితానము మంత్రము లుగ్గడింపఁగన్. 73

మ. సనెకల్ హత్తఁగఁ జేసె నంఘ్రి చెలి చంచత్కుడ్యచిత్రాత్మ ని
ల్చినకంతుండు పురాకృతాగము సనం జిత్తంబులో నిల్పి యం
చనరక్తిం దనుఁ బ్రోవు మంచుఁ దదనుచ్ఛాయోపధిం డాసి వం
దన మూన్పం గని ప్రోతు నం చభయపాదం బూన్చు చందంబునన్. 74

చ. జనపతి మౌళి భూసురు లొసంగుశుభాక్షతపాళిఁ దాల్చి యం
గనలు ఘటించునారతులు గన్గొని యంత వధూకరాత్తహ
స్తనళినుఁడై ముదంబున లసత్కులదేవగృహంబుఁ జేర నొ
య్యనఁ జనియెన్ గలధ్వనుల నైదువు లింపుగఁ బాటఁ బాడఁగన్. 75