పుట:Chandrika-Parinayamu.pdf/257

వికీసోర్స్ నుండి
ఈ పుట అచ్చుదిద్దబడ్డది

వ. అని యెఱింగింప ననంగీకారభంగి నయ్యంగనయంతరంగం బెసంగిన నాచెంత నొక్క నరపుంగవుం జూపి సారంగధారిసారంగయాన తరంగవళీమణిం గుఱించి యిట్లనియె. 97

కేరళదేశాధిపతి


చ. ఇనకులమౌళి కేరళమహీపతి యీతఁడు గాంచు ప్రీతితో
మనఁగ నపారిజాతమహిమంబున రాజిలు నివ్విభుఁ డుర్వరన్
మను ననపారిజాతమహిమంబునఁ గుందరదాలలామ! పా
వనసుమనోహృదిష్టఫలవారవితీర్ణికలాచమత్కృతిన్. 98

మ. అనిశం బీఘనుకీర్తిధామయుగళంబన్యోన్యవైరాప్తినో
యన నం దొక్కటి ప్రోవ వేఱొకటి వజ్రారూఢిఁ గూల్చున్ విరో
చను వేఱొక్కటి యేఁచ నందొకటి మించం జేయు హంసోన్నతిన్
మును మున్నొక్కటి నొంప వేఱొకటి మన్పుం గొమ్మ! చిత్రంబుగన్. 99

చ. సలలితచక్రసంభరణసక్తమహాశయు దేవవర్ణితో
జ్జ్వలదయుఁ బూరుషోత్తము నిశాచరసాధ్వసకృత్సమాఖ్యు ని
య్యలఘునిఁ జెట్టవట్టి హరి నంబుధిరాజతనూజ వోలె ని
చ్చ లురముఁ బాయ కింపున నెసంగుము వాసవనీలకుంతలా! 100

ఉ. నా విని కొమ్మ యక్షివలనంబునఁ దన్నృపచంద్రనిస్పృహ
శ్రీవెలయింప ముంగలికిఁ జేర ఘటించె వయస్య యోర్తు దో
డ్తో వరయానధుర్యతతితో వివరించుచు నప్పు డొక్క పృ
థ్వీవిభుఁ జూపి గౌరి సుదతిం బలుకుం బ్రియవాక్యనైపుణిన్. 101

దహళభూపాలుఁడు


క. నాళీకనయన! పార్థివ
మౌళీమణిఁ గాంచు దహళమహివిభు రతిరా
ట్కేళీనూత్నకళాసౌ
శీలీమన్మనుజలోకశేఖరు వీనిన్. 102