పుట:Chandrika-Parinayamu.pdf/129

స్వమృగహింసావిహారము గాంచురతిఁ బోలెఁ
దలపై నెగయు వాలదండ మొనర,
నిగుడు కోపాంకురనికరం బగుటఁ బోలె
సితకేసరముల కెంజిగి చిగుర్ప,

తే. వక్రదంష్ట్రలు శతకోటి వాదు గెలువ
వర్తులపుఁ గన్నుగవ భానువాసిఁ గేర,
ఘుటఘుటార్భటి ఘనకోటిపటిమ దెగడ
నొక్క సింగంబు వడిఁ బొదనుండి వెడలె. 27

క. వెలలి జిఘృక్షాగౌరవ
కలనన్ లంఘింప నృపతి గన్గొని నిజని
స్తుల చంద్రహాసధారం
దలఁ ద్రెవ్వఁగ నేసె నద్భుతంబుగ నంతన్. 28

మ. క్షితినాథేంద్ర శితాసిసంహతిభవాసృగ్వ్యాప్త తత్సింహరా
జ తనూదీధితిసంధ్యలో వెడలు భాస్వన్మూర్తి నా నొక్కమా
నిత తేజస్తతి దోఁచె నంత నచట న్వీక్షింప నయ్యెన్ రమా
పతి నా పూరుషరూప మొక్కటి జగత్ప్రస్తుత్య దీవ్యద్ద్యుతిన్. 29

చ. అది గని యానృపాలుఁడు మనోంబురుహంబున విస్మయాంకురం
బొదవఁగ నుండఁ, గిన్నరత నూనుచుఁ, దత్పురుషావతంస మా
యుదధిగభీరుఁ జేరి, వినయోన్నతి, ‘భానుకులాయ, శత్రువ
ర్యదమనపణ్డితాయ, భవతేఽస్తు నమో’ యని మ్రొక్కె, మ్రొక్కినన్. 30

తే. ఆదరంబునఁ గెంగేల నతని నెత్తి
దండఁ గూర్చుండఁ గావించి ధరణిభర్త
తత్కథా శ్రవణైక ముదాయుతాత్మ
నప్పురుషమౌళిఁ గాంచి యిట్లనుచుఁ బలికె. 31