పుట:Chandrika-Parinayamu.pdf/127

సీ. కట్టెండ వెడఁదకాఁకఁ గఱంగి ప్రవహించు
జవ్వాదిడిగ్గియచాల లోయఁ
బడుచుఁ జొక్కపుఁ గ్రొత్తపటికంపుఁజఱిపజ్జ
బాగైన కెంపురాపణుకువాలు
పొదరుఁ బొన్నల రాలుపుప్పొడియిసుముపైఁ
బగిలి యొప్పెడు వేరుపనసపంటి
నీటికాల్వలఁ బ్రోచి పాటించు జేజేల
మ్రాఁకుతీవలఁ జుట్టిరాఁగ నలరు

తే. దాకపందిలిక్రింద నిద్దంపువేడ్క
దవిలి కోలాట మాడుగంధర్వసతుల
చారు సౌవర్ణకటకసింజా నినాద
కుల ఘుమఘుమాయమాన మౌ కోనఁ గనియె. 20

లయగ్రాహి
మానిత నవీన కిసలానురతి కానఘ పికీనిచయ గానములచే నళినికానీ
కానుగత మానసచరీనిరుపమానరుతిచే నళికులీనవనితానికర నానా
ధ్వానములచే ననిలయానమునఁ బైనిగుడుసూనతతి తేనియలసోన రొదచే నిం
పైన యలకోనఁ గని యానృపతి దా నెనసె మానసతటీ నివిశమాన ముదమంతన్. 21

తే. ఇట్టు లక్కోన నెనసి తదీయ చిత్ర
మహిమ మెంతయుఁ గాంచుచు మనుజనేత
తళుకుఁ బ్రాఁగెంపు మెట్టులదారి డిగ్గి
యాత్మహితుతోడ నొయ్యన యరుగ నచట. 22

చ. పగడపుఁగంబముల్, తళుకుఁబచ్చలబోదెలు, కెంపుదూలముల్,
జగమగఱాలదెంచికలు, చక్కని నీలపుఁబల్కచాల్, మెఱుం
గగు తెలిమిన్నలోవయును, నచ్చపు బంగరు పేరరంగునం
దగఁ గనుపట్టు నొక్క వికసన్మణిమండప మప్డు దోఁపఁగన్. 23