పుట:Chandrika-Parinayamu.pdf/101

మ. వరవర్ణక్రమభాసివాహయుతి, భాస్వచ్చంద్రచక్రాప్తి వీ
టి రథశ్రేణి వహించియున్, గడునఖండీభూతవిస్ఫూర్తిచే
నరుదై పొల్చుట నొక్కొ, కేరు, గిరికన్యాధీశచక్రాంగవై
ఖరి, నుద్యద్వలభీ విలంబిత మణీఘంటాళి ఘాణంఘణిన్. 97

చ. స్థిరసుమనోవితానములచే, ననిమేషవిలోలలోచనో
త్కరములచే, ననర్ఘమణికామయకూటచయంబుచే, సిరిం
గరము పొసంగు వీటి నవకాంచనసౌధపరంపరల్, మరు
ద్గిరివరవైఖరిం బొలుచు దివ్యపథం బధరీకృతంబు గాన్. 98

మ. అవడీనానిల వాసనాజనిత హార్దాప్తిం, బురిన్ భర్మహ
ర్మ్య వితానాశ్రిత యోషిదాస్యములఁ జేరంబోవు దివ్యాపగా
బ్జవస ద్బంభరపాళి, కుద్గమనజశ్రాంతిం దొలంచున్, విలా
స వనీ సాలలతాంతగంధ లహరీసారంబు మధ్యేసృతిన్. 99

మ. పుర చామీకరసౌధ చత్వర మణీపుత్రీ ముఖాంభోజముల్,
శరజాసాలయ కుడ్యబింబితము లై, చక్కం గనన్, దోఁచు ని
ర్భరదర్శార్కకరాభిచర్విత నిశారాణ్ణిర్మిమిత్సాప్తవా
గ్వర సంయోజిత చంద్రకారణచయవ్యాప్తిన్, విజృంభించుచున్. 100

చ. అతులశుభాగమక్రమము స్వాశ్రిత భూరికలస్వన ద్విజే
శతతులు దెల్ప, వీటిమణిసౌధము, లాజిర హర్మ్యలక్ష్మిపైఁ
జతురత నించుసేస, గృహచత్వర వీథిక లొంది, జాలకా
రతిఁ దగుచాన లెల్లఁ దొరరాజిల ఱువ్వెడు మొగ్గచాలునన్. 101

మ. తరుణుల్ వీటిశిరోగృహాళి నిసి ముక్తాకంతుకం బాడుచోఁ,
గరకంజంబున జాఱి, బంతి, కడ కేఁగన్, దత్సృతిం జేరు చం
దురుఁ, దద్బుద్ధి గ్రహించి, గోర్పఁగఁ, దదస్తోకాహతిన్ గందెఁగా,
కురుమాలిన్యము సత్కులాధిపతి కెట్లొందున్? మదిం జూడఁగన్. 102