ఈ పుట అచ్చుదిద్దబడ్డది
'అనగా'అనగా ఒకకాకి. దానికోకపిల్ల. ఈ రోజుల్లో అందరిపిల్లలూ చదువు కుంటూవుంటే, నా పిల్లకి మాత్రం ఏమితక్కువని కాకి, పిల్లని బడికిపంపి చదువు చెప్పించింది.
గొంతు బాగున్నవాళ్లూ, బాగులేనివాళ్లూకూడా సంగీతం నేర్చుకోవడం చూసి, నాకూతిరికి సంగీతం చెప్పిస్తానని కాకి, పిల్లకి సంగీతం చెప్పించింది.
అందంవున్న వాళ్లూ , లేనివాళ్లూకూడా నాట్యం నేర్చుకుంటూ వుంటే, నా పిల్లమాత్రం తీసిపోయిందా ఏమిటని, కాకి, పిల్లకు నాట్యం నేర్పించింది. ఇలా మూడు విద్యల్లో కాకి తనపిల్లని తయారుచేసింది. ఎలాగైనా, కాకిపిల్ల కాకికి ముద్దు గదా !
ఇలా వుంటుండగా, కాకిపిల్ల ఒకరోజున ఒకమాంసంముక్క తెచ్చుకొని, చెట్టుకొమ్మమీద కూచుని నములుతోంది. అది ఒకనక్క చూసింది. నక్కకి జిత్తులు పుట్టుకతో వచ్చిన బుద్దులుగదా. కాకిపిల్లను మోసంచేసి, ఎలాగయినా ఆ మాంసంముక్క కాజేదామనుకుంది.
కాకిపిల్ల కూచున్న చెట్టు దగ్గరికి వెళ్లి కాకిపిల్లనుచూసి " ఏం, మరదలా బాగా చదువుకున్నావా?" అని అడిగింది.
కాకిపిల్ల చదువులు నేర్చిందికదా! అంచేత నక్కజిత్తులు దానికి తెలుసు. పైగా, పూర్వం ఒకనక్క, ఒకకాకిని మోసంచేసి దానినోట్లోవున్న మాంసం ముక్కను కాజేయ్యడం కథకూడా కాకిపిల్ల రెండోక్లాసులో చదువుకుంది.
