శ్రీపాద సుబ్రహ్మణ్యశాస్త్రి
అనుభవాలూ - జ్ఞాపకాలూను
☆ ☆ ☆
మూడో సంపుటం
☆ ☆ ☆
అయిదారు మాసాలపాటు తిప్పి తిప్పి కొట్టింది నన్నష్ఠావధాన వ్యామోహం.
కూచుంటే పద్యం, నుంచుంటే పద్యం, పడుకుంటే పద్యం - అష్టావధానం చేసేటప్పుడు చూపించవలసిన మెళుకువలూ, మొలిపించవలసిన చమక్కులూ-తరుచు వీటికీ- యిలాంటి భేషజాలకూ సంబంధించిన ఆలోచనలు - ఇలా గడిచేది కాలం నాకా సందర్భాన.
ఒక్కొక్కప్పుడు, నిజంగా, అష్టావధానం చేస్తున్నా ననుకుంటూ ఉపక్రమోప సంహారాలకు సంబంధించిన ఉపన్యాసాలు కూడా దంచే వాణ్ణి నాలో నేను, ఏకాంతస్థలాన.
స్వయంభువూ కాదు, సాధ్యాసాధ్యాలూ అవసరావసరాలూ చర్చించుకుని స్థిరపరుచుకున్నదీ కాదు, కేవలమూ నడమంతరపు సిరివంటి దయిపోయింది నాకది.
నడమంతరపు సిరీ, నరాలమీది కురుపూ వొకటే రాశి.
వాటి ఉద్ధృతం తట్టుకోడం సాధ్యం కాదెవరికీ.
గతినిరోధం యేర్పడాలి, నసాళం అంటే దెబ్బయినా తగలాలి అవి తప్పించుకోవాలంటే, మరో దారి లేదు.
కాగా, దాసోహం అనకుండా వుండలేకపోయా న్నే నష్టావధానానికి.
దాని క్కారణం - ఎటు చూసినా, నాకు, సంసారం నిర్వహించుకోవడానికి తగ్గ ఆర్జనశక్తి లేకపోడమూ, సంసారం మీదే పడిపోడమున్ను.
అయితే, చాలాకాలం నేనది పట్టించుకోలేదు.
నాకెప్పుడూ వుంటున్నదే డబ్బు ఇబ్బంది, అప్పుడు మరీ దారుణం అయిపోయింది.
అనుభవాలూ - జ్ఞాపకాలూను - 3
435
