'చిలుకూరి దేవపుత్ర సాహిత్య పురస్కారం - 2019' ను ప్రముఖ రచయిత్రి నల్లూరి రుక్మిణిగారికి అనంతపురంలో
24-04-2019న ఎన్.జి.ఓ. హూమ్ లొ అందజేశారు. సభాధ్యక్షులు బండి నారాయణ స్వామి మాట్లాడుతూ “నల్లూరి రుక్మిణి గారికి చిలుకూరి దేవపుత్రగారితో సామీప్యతగా ఉండేవారని అన్నారు. 'రుక్మిణిగారు అవార్డులకై ఎప్పుడూ ఆశించే రచయిత్రి కాదు. హుందాగా ఉండే రచయిత్రి నల్లూరి రుక్మిణి' అని ప్రశంసించారు. ముఖ్య అతిధిగా రాచపాళెం చంద్రశేఖరరెడ్డిగారు మాట్లాడుతూ నల్లూరి రుక్మిణిగారికి శుభాకాంక్షలు తెలియజేశారు. నల్లూరి రుక్మిణిగారు నిజాయితీగల రచయిత్రిగా పేర్కొన్నారు. రాయలసీమ అంతటా పర్యటించి, కరువు మీద కథలు రాశారు అన్నారు. విశిష్ట అతిథి స.వెం. రమేశ్, ఆత్మీయ అతిథిగా శాంతినారాయణ, వక్తగా నాగేశ్వరాచారి మాట్లాడారు.
బళ్ళారి జిల్లా పట్టణంలోని రాఘవ కళామందిర భవనంలో 25-4-2019 న తెలుగు రచయితల సమావేశం నిర్వహించారు.
రాఘవ కళామందిరం అధ్యక్షులు కోటేశ్వరరావుగారు సభకు అధ్యక్షత వహించారు. తెలుగు భాషోద్యమకారులు స.వెం. రమేష్ ముఖ్య అథిదిగా మాట్లాడుతూ తమిళనాడు ప్రాంతంలో తెలుగుభాషా స్థితిగతుల గురించి ఆ ప్రాంతంలో సంఘాలు చేస్తున్న కృషి గురించి వివరించారు. వివిధ ప్రాంతాలలోని తెలుగు ప్రజలు తమ జీవితాలను, సంస్కృతిని రచనల ద్వారా రికార్డు చేయాలని కోరారు. బళ్ళారి ప్రాంతంలో కూడా తెలుగు రచయితలు క్రియాశీలకంగా రచనలు చేసి, పుస్తకాలుగా ప్రచురించాలన్నారు. సంఘంగా దీర్ఘకాలిక కార్యక్రమాలు కొనసాగించాలని కోరారు. తెలుగుభాషా కార్యకర్తలు హైదరాబాదు నుండి అడపాల సుబ్బారెడ్డి, అనంతపురం నుండి డా. అప్పిరెడ్డి హరినాథరెడ్డి తదితరులు పాల్గొన్నారు. బళ్ళారి ప్రాంత రచయితలతో బళ్ళారి జిల్లా రచయితల సంఘం ప్రారంభించారు. సంఘం నిర్వహణకు ఆర్. దేవన్న గారిని ఎంపిక చేసారు. చెన్నప, బసవరాజు, రమేష్ పాటిల్, రామాంజినేయులు, సత్యనారాయణ రెడ్డి, సురేష్, రుద్రప్ప, మల్లికార్జున రెడ్డి, ప్రభాకర్, సిద్దరామ, నేతి రఘురామ్, పంపన గౌడ, వెంకటేషు తదితరులు పాల్గొన్నారు.
