జాతిరత్నమై మెరిసెనే
జాతి రత్నమై మెరిసెనే ఫూలే
జోతిగా వెలుగు నిచ్చేలే
ఘనమైన ఫూలే చరిత దెల్సుకోని
జగమందు మన భవిత రాసుకుందామా ॥జాతి॥
పువ్వులమ్ముకునే పేదోల్ల గుడిసెల్లో
పురుడుబోసుకుండు తూరుపు దిక్కోలే
కులము పేరుతోని మతము పేరుతోని
జరిగే అవమానంతో గుండె బగిలినాడు
మూఢనమ్మకాల ముసుగులో ముంచేటి
బ్రాహ్మణ కుట్రల్ని ఎదిరించాలని చాటి ॥జాతి॥
కులమేంది మతమేంది ఎవడెట్ల బోతేంది
అగ్రవర్ణం జోలికోవొద్దు నా బిడ్డా
ఎద్దు ఎవసం జేసో సెట్టు పుట్టలు బట్టో
పూలతోటలు బెంచి పూలమ్ముదామంటూ
శతపోరినా తండ్రి మాటలు వినకుండా
తనజాతి సేవకే అంకిత మయ్యిండు ॥జాతి॥
ఆంగ్ల గ్రంధాలెన్నో అధ్యయనం జేసిండు
కుల మతా సారాన్ని కాచి వడబోసిండు
అంటరానితనము అజ్ఞానమేందంటూ
తన తండ్రి గోవిందరావునడిగినాడు
అగ్రవర్ణంబెట్టే బాదల్ని భరియించి
అనగారినా జాతి వీముక్తికై బతికి ॥ జాతి॥
235
అంబటి వెంకన్న పాటలు