అవతారిక
ఈ యాంధ్రమంత్రులంగూర్చి ఎవరును విపులముగా వ్రాయలేదు. అందులకై ప్రారంభింపఁగా నాకు వీరిచరిత్ర ఒక ప్రకారము గా దొరకలేదు. సర్కారు పండితుఁడు రచించిన ఔరంగజేబు చరిత్రమున అచ్చటచ్చట కొంతగలదు. అతఁడు సయితము ప్రాచీన దాక్షిణాత్యచరిత్రకారుల గ్రంథములను పరిశీలించినట్లు లేదు. ఈభావమునే వెల్లడించుచు, తానాషా, అక్కన్న మాదన్నలలో ఎట్టిదోషమును లేదనియు ఔరంగజేబు సామ్రాజ్యకాంక్షచే వారిపై అసత్యమును ఆరోపించేను ప్రొఫెసర్ అబ్దుల్మజీద్సిద్దికిగారు ఒక వ్యాసమును ఆంగ్లమున రచించియున్నారు. [హైదరాబాద్ అకాడమీ జర్నల్] భారతీయ పరిశోధకమండలి, పూనా, వారు ప్రకటించిన ‘గోల్కొండ్త కుతూబ్శాహీ’ గ్రంథమున, మెకంజీదొర వారి స్థానికచరిత్రలనుండి కొంతయు, ‘హదికత్-ఉల్-అలామ్’ అనుగ్రంథమునుండి కొన్ని ప్రకరణములును కలవు. మదరాసు విశ్వవిద్యాలయ సంస్కృతాచార్యులు శ్రీ డాక్టరు రాఘవ గారు, డాక్టరు సి. కున్హరాజాగారికి మిత్రులు సమర్పించిన సంపుటములో తానాషా గురువు బడే అక్బర్ షా శృంగారమంజరినిగుఱించి యొకవ్యాసము వ్రాయుచు తానాషానుగుఱించి వ్రాసియున్నారు. ఇటీవల శృంగారమంజరినే ప్రకటించినారు.
డచ్చిరచయిత హవార్టు వీరింగూర్చి వ్రాసియున్నాఁడు. వీరు మొదట 1666 లో సయ్యద్ ముస్తఫా (తర్వాతి మీర్
