పుట:2015.391574.BHAKTIRASA-SHATAKA.pdf/263

వికీసోర్స్ నుండి
ఈ పుట అచ్చుదిద్దబడ్డది

252

భక్తిరసశతకసంపుటము


క.

ముసలహలంబును గైకొని
వసుధం గలదుష్టదైత్యవర్గము నెల్లన్
గసిమసఁగఁజేసి త్రుంచవె
రసికులు కీర్తింపఁగ బలరామ ముకుందా.

36


క.

కాంచి చతుర్ముఖషణ్ముఖ
పంచముఖసహస్రముఖులు భక్తిమెయిం గీ
ర్తించఁగ మెలఁగెడునిను సే
వించెద గోపాలకృష్ణవేష ముకుందా.

37


క.

శుద్ధాత్మలఁ ద్రిపురాసుర
శుద్ధాంతాంగనలవ్రతము చూఱలుగొనవే
బౌద్ధావతారమున సుర
సిద్ధాదులు పొగడ భక్తసేవ్య ముకుందా.

38


క.

కలికిమహారూపుఁడవై
ఖలులగు మ్లేచ్చులను దునిమి కారుణ్యమునం
గలిదోష మడఁతువౌగద
సలలితఘననీల సుగుణజాల ముకుందా.

39


క.

దశరూపములను బూని త్రి
దశులు నమోనమ యటంచుఁ దద్వేళల నీ
యశముఁ గొనియాడఁగా దు
ర్దశలను బాపుదువుగాదె దయను ముకుందా.

40