పుట:2015.390519.Shashamka-Vijayamu.pdf/39

ద్వితీయాశ్వాసము

39

సీ.⁠

కనుఱెప్ప వెట్ట కాతని నెగాదిగఁ జూచుఁ,         జూచి యల్లన తల యూఁచి మెచ్చు మెచ్చి మోహము బయల్మెఱయఁ బక్కున నవ్వు,         నవ్వి తోన గిరుక్కునను దొలంగుఁ దొలఁగి వెంటనె యోరఁ దళుకొత్తఁ గన్గొను,         గన్గొని వానిఁ జెంగటికిఁ బిలుచుఁ బిలిచి యూరక సీమఁ గలముచ్చటల నాడు,         నాడి యేకాంత మటంచుఁ జేరుఁ

⁠

గీ.⁠

జేరి చెవిలోన గుసగుస ల్చెప్పినట్ల మోహమున వానిచెక్కిట మోముఁ జేర్చుఁ జేర్చి చెక్కులఁ బులకలు చెంగలింప నవశ యై చొక్కుఁ దమి మీఱి యామిటారి.

⁠ 77

చ.⁠

గడెతడ వాతఁ డొక్కపనిగాఁ జని యింటికి రాకయుండినన్ దడఁబడు మీఁ దెఱుంగదు వితాకున నుండును జిన్నవోవుఁ దా బుడుతలచేతఁ బిల్వఁబనుపున్ మఱి వచ్చిన నింతసేపు నె క్కడ నని మోడిగాఁ బలుకుఁ గ్రక్కున నవ్వును నాతఁ డల్గినన్.

⁠ 78

ఉ.⁠

అందపుజాఱుఁగొప్పు నసియాడెడుకౌనును లేఁతవెన్నెలల్ సిందెడునవ్వు నబ్బురపుసిబ్బెపుగుబ్బ సగంబు గానరాఁ గ్రిందును జీరుపయ్యెదయు గిల్కు గిలుక్కని మ్రోయుమట్టియల్ చం దమరంగ నిందుముఖి చందురుముందఱ నిల్చుఁ గుల్కుచున్.

⁠ 79

ఉ.⁠

మట్టుకు మీఱుమోహమున మానిని వానికి మేలిదుప్పటు ల్గట్టఁగ నిచ్చుఁ గుంకుమముఁ గస్తురిఁ దానె యలందుఁ గ్రొవ్విరు ల్చుట్టు ననర్హ్యరత్నములసొమ్ములు వెట్టును భోజనం బిడున్ గట్టెఁడుతెల్లనాకులును గప్పురబాగలు నిచ్చు నిచ్చలున్.

⁠ 80

సీ.⁠

జిలుఁగువల్వ వదల్చి చెంగావి ధరియించి,         యది బాగొ యిది బాగొ యనుచు నడుగు ఱైక సడల్చి యారజపుఁబైఁట ఘటించి,         యది మేలొ యిది మేలొ యనుచు నడుగు జడ విచ్చి వింతగా జాఱుకొ ప్పమఱించి,         యది నీటొ యిది నీటొ యనుచు నడుగు

⁠