మంచిమాటల నెంత బోధించి చెప్ప మడియ రండకుని గుణంబు విడువబోదు మదరిపువిఫాల మునిజనహృదయలోల వేణుగోపాల భక్తసంత్రాణశీల!
ఖేదమోదంబుల భేదంబు తెలియక గోలనై కడిపితిఁ గొన్నినాళ్ళు పరకామినుల కాసపడి పాపమెఱుఁగక కొమరుప్రాయంబునఁ గొన్నినాళ్ళు ఉదరపోషణమున కుర్వీశులను వేడి కొదవచేఁ గుందుచుఁ గొన్నినాళ్ళు ఘోరమైనట్టి సంసారసాగర మీఁదు కొనుచుఁ బామరముచేఁ గొన్నినాళ్ళు జన్మమెత్తుట మొదలు నీ సరణిఁ గడచె నెటుల గృపఁ జూచెదో గతం బెంచఁబోకు మదరిపువిఫాల మునిజనహృదయలోల వేణుగోపాల భక్తసంత్రాణశీల!
గజముపై చౌడోలు గాడిదకెత్తితే మోయునా పడవేసి కూయుఁ గాక చిలుక పంజరములోపల గూబ నుంచితే పలుకునా భయపడి యులుకుఁ గాక కుక్క నందలములోఁ గూర్చుండఁబెట్టితే కూర్చుండునా తోళ్ళు కొఱుకుఁ గాక ధర్మకార్యములలో దరిబేసి నుంచితే యిచ్చునా తన్నుక చచ్చుఁ గాక చెడి బ్రతికినట్టి శుంఠను జేర్చుకొనిన వాఁడు చెడు నుంచుకొన్న భూపతియుఁ జెడును మదరిపువిఫాల మునిజనహృదయలోల వేణుగోపాల భక్తసంత్రాణశీల!