పుట:2015.386124.adhiqs-eipa-shatakamulu.pdf/87

వికీసోర్స్ నుండి
ఈ పుట అచ్చుదిద్దబడ్డది


వెన్న గలిగియు నేతికి వెదకినటుల
పరుల దలతురు మీ మహత్తెఱుఁగ లేక
మదరిపువిఫాల మునిజనహృదయలోల
వేణుగోపాల భక్తసంత్రాణశీల!

9


సీ.

సూక్ష్మస్నానము చేసి సొక్కినవేళ సా-
            మితధారణము చేసి మెలఁగువేళ
బడలిక పైనంబు నడచి వచ్చినవేళ
            సురతాప్తి ‘హా’ యని సొక్కువేళ
నొంటరిగాఁ జీఁకటింట నుండినవేళ
            నలుకతోఁ బవళించునట్టివేళ
దెఱఁగొప్ప మనమున దిగులు చెందినవేళ
            భక్తి గన్నట్టి విరక్తివేళ
లక్ష్యభావంబుఁ జూడ సలక్షణముగ
బండువెన్నెల గతిఁ గానబడును ముక్తి
మదరిపువిఫాల మునిజనహృదయలోల
వేణుగోపాల భక్తసంత్రాణశీల!

10


సీ.

అగ్రజన్మము తీరమందు వాసంబును
            వితరణము ననుభవించు నేర్పు
సంగీతసాహిత్యసంపన్నతయు మఱి
            రసికత బంధుసంరక్షణంబు
ననుకూలమైన చక్కని భార్య రాజస-
            న్మానంబు ప్రఖ్యాతి మానుషంబు
సౌందర్య మతిదృఢశక్తి విలాసంబు
            జ్ఞానంబు నీ పదధ్యాననిష్ఠ
ఇన్నివిధములు గలిగి వర్తించు నరుఁడు
భూతలస్వర్గపదములు బొందుచుండు
మదరిపువిఫాల మునిజనహృదయలోల
వేణుగోపాల భక్తసంత్రాణశీల!

11