పుట:2015.386124.adhiqs-eipa-shatakamulu.pdf/124

వికీసోర్స్ నుండి
ఈ పుట అచ్చుదిద్దబడ్డది


నీ యభావవిరక్తుల కేమి ఫలము
తినక చవిచూడకయె లోఁతు తెలియబడునె
యెంతవానికినైన మహీస్థలమున
మదరిపువిఫాల మునిజనహృదయలోల
వేణుగోపాల భక్తసంత్రాణశీల!

95


సీ.

తన తల్లి శిశువుల తల ద్రుంచివైచినఁ
            జెడుముండ యనుచు వచింపరాదె
తన తండ్రి యొరుల విత్త మపహరించిన
            నన్యాయవర్తనుం డనఁగరాదె
తన దేశికుఁడు పరదారసంగ మొనర్పఁ
            బాపకర్ముండని పలుకరాదె
తన రాజు ప్రజలపట్ల నదప జూచినఁ
            గ్రూరాత్ముఁడనుచు వాక్రువ్వరాదె
యిట్టి పలుకులు తప్పుగా నెన్నునట్టి
కుటిలచిత్తుల గర్వంబు కొంచెపఱుప
మీకు గాకన్యులకు శక్యమే తలంప
మదరిపువిఫాల మునిజనహృదయలోల
వేణుగోపాల భక్తసంత్రాణశీల!

96


సీ.

ఆశకు ముదిమియు నర్థికి సౌఖ్యంబు
            ధనపరాయణునకు ధర్మచింత
కఠినమానసునకుఁ గరుణాపరత్వము
            వెఱ్ఱిమానిసికి వివేకగరిమ
యల్పవిదునకు నహంకారదూరత
            జారకామినికి లజ్జాభరంబు
బహుజనద్వేషికిఁ బరమాయురభివృద్ధి
            గ్రామపాచకునకుఁ గౌరవంబు
తామసగుణాఢ్యునకు సత్త్వగుణయుక్తి
పాపభీరుత సంతానబాహ్యునకును
గలదనెడు వార్త గలదె లోకములయందు
మదరిపువిఫాల మునిజనహృదయలోల
వేణుగోపాల భక్తసంత్రాణశీల!

97