ఉ. నోరికి వచ్చినట్టు నిను నూఱువిధంబులఁ బ్రస్తుతింతు నే
నేరుతు నేరఁ బొమ్మనక నీపయి నొచ్చెములేని మచ్చికన్‌
గారవమంద మత్ప్రణుతిఁ గైకొనఁగాఁ దగు గౌరవంబునన్‌
వారని కూర్మి పేర్మి బసవా! బసవా! బసవా! వృషాధిపా!105
చ. బసవఁడు ప్రీతిఁ గైకొనియె భక్తిమెయిన్‌ రచియించినాఁడ నే
బసవపురాణమంచు మునుఁ బ్రస్తుతి సేయుదురట్లుగాన నీ
యసమదయాధురీణతకు నంకిలిపాటు ఘటిల్లకుండ నన్‌
వసిఁగొని బ్రోవుమయ్య బసవా! బసవా! బసవా! వృషాధిపా!106
చ. సురవరమల్ల! మల్లవిత సూత్రసుధాంబుధిఖేల! ఖేలసం
గర కలకంఠ! కంఠమణినాయకభీమభుజంగ! జంగమ
స్థిరతరనాథ! నాథక నిధీకృతరూప! విరూప సమ్మతా
వర! కరుణాబ్ధి! ప్రోవు బసవా! బసవా! బసవా! వృషాధిపా!107
చ. సురవర పూజ్య! పూజ్యగుణశోభిత! శోభితరూప! రూప వి
స్ఫురతరశీల! శీలగుణపుంగవ! పుంగవ సత్త్వ! సత్త్వసం
వర పరవాద! వాద భయవర్జిత పాపవిచారచార! ఈ
శ్వర సమ! నీవె దిక్కు బసవా! బసవా! బసవా! వృషాధిపా!108
పుట:2015.370800.Shatakasanputamu.pdf/36
ఈ పుట అచ్చుదిద్దబడ్డది
