పుట:2015.370800.Shatakasanputamu.pdf/356

వికీసోర్స్ నుండి
ఈ పుట అచ్చుదిద్దబడ్డది

సీ. రుక్మిణికొఱకునై రూఢిగా భీష్మక
               నగరంబుఁ జొచ్చి యాఖగకులేంద్రుఁ
     డమరనాథుని గెల్చి యమృతంబుఁ గైకొన్న
               కరణి చైద్యాదుల నురువడించి
     పుష్పగంధిని గొనిపోవఁగ రుక్మకుం
               డదె పోకుమని వెంటనంటి వాఁడి
     నారసంబులనేయ నవ్వి యాతనిఁబట్టి
               బావ రమ్మని శితభల్లములను
గీ. దలయు మూతియు రేవులై తనర గొరిగి
     నట్టి హాస్యరసంబు నీకలరె నౌర
     సురుచిరాకార ఉన్నవపురవిహార
     రాజగోపాల రాధామనోజఖేల.64
సీ. మధురాపురంబు నెమ్మది నేలుచుండంగఁ
               జతురంగబలసముచ్చయము తోడ
     నడరి జరాసంధుఁ డతికోపఘూర్ణిత
               హృదయుఁడై దాడిగాఁ బొదివి నిన్నుఁ
     గదనంబునకుఁ బిల్వ మదిలోన నూహించి
               నగరంబు వెడలి కాననముఁ జొచ్చి
     కొండఁ బ్రాఁకినఁ జూచి ఘోరదావానలం
               బిడిన నందుండక కడురయమున
గీ. ద్వారకాపుర మిరవుగాఁ జేరి యుండి
     నట్టి భయరస మవ్వేళ కలరె నౌర
     సురుచిరాకార ఉన్నవపురవిహార
     రాజగోపాల రాధామనోజఖేల.65