పుట:2015.370800.Shatakasanputamu.pdf/355

సీ. ధరణిలో నొకవిప్రవరుఁడు కుచేలుండు
               నిరుపేఁద యైయుండి నెమ్మినొక్క
     నాఁడు భవద్దర్శనముఁ గోరి తనజీర్ణ
               పటముకొంగునఁ గొణిదెఁ డటుకు లునిచి
     కొనివచ్చి నినుఁ గాంచి యొనర దీవించిన
               నేమితెచ్చితి వని ప్రేమతోడ
     నరసి యాపృథుకముల్ కరమున నిడుకొని
               భక్షణం బొనరింప దత్క్షణమున
గీ. వితతసామ్రాజ్యవిభవసంగతునిఁ జెసి
     నట్టికరుణారసంబు నీకమరె నౌర
     సురుచిరాకార ఉన్నవపురవిహార
     రాజగోపాల రాధామనోజఖేల.62
సీ. బలభేది యలుకతొఁ బటుతరమేఘజా
               లములను విడిచి శిలాప్రయుక్త
     వర్షంబుఁ గురియింప వల్లవజనమును
               గోవులు భీతి నాకులత నొంద
     వీక్షించి మీరేల వెఱచెద రని వారి
               నందఱ నావులమందఁ దోలు
     కొనుచు రమ్మని పోయి గోవర్ధనాచలం
               బిరవుగా నొకకేల నెత్తిపట్టి
గీ. సర్వజీవుల నెల్ల రక్షనముచేసి
     నట్టియద్భుతరసము నీ కలరె నౌర
     సురుచిరాకార ఉన్నవపురవిహార
     రాజగోపాల రాధామనోజఖేల.63