పుట:2015.370800.Shatakasanputamu.pdf/348

సీ. శుండంబు నవనీతసుందరగంధవా
               హాలంకృతంబుగా నలరుచుండ
     మాటలు తస్కరకోటియుక్తివ్యాజ
               పాటనంబున మీటి తేటపడఁగఁ
     గన్నులు కుహనాప్రకారభాసురములై
               జారవిలాససంచరతఁ దెలుపఁ
     దరుణాంఘ్రిపంకజద్వంద్వంబు సారెకుఁ
               బటుతరతాండవభ్రమము నెఱప
గీ. సొబగు మీఱిననినుఁ జూచుసుదతు లెల్లఁ
     బంచశరసాయకంబులపాలు గారె
     సురుచిరాకార ఉన్నవపురవిహార
     రాజగోపాల రాధామనోజఖేల.48
సీ. ఎవ్వనిమృదుభాష లిందుబింబాననా
               శ్రవణరంధ్రములకుఁ జవులు గఱపు
     నెవ్వనిక్రేఁగంట నెసఁగినచూడ్కులు
               కామినీహృదయముల్ గఱఁగఁజేయు
     నెవ్వనిమోవి పైనవ్వు భామాజన
               వరలోచనోత్సవకరము నెఱపు
     నెవ్వనిసుందర మిక్షుకోదండుని
               భంగి నింతులనెల్ల భ్రమయఁ జేయు
గీ. నట్టినీమోహనాకార మవనిలోన
     వలపుఁ బుట్టింపదే పతివ్రతలకైన
     సురుచిరాకార ఉన్నవపురవిహార
     రాజగోపాల రాధామనోజఖేల.49