పుట:2015.370800.Shatakasanputamu.pdf/267

     యనుఁగుఁదమ్ముఁడు సుమిత్రాత్మజుఁ డొక్కఁడె
               మిముఁ గొల్చి వెతమాని మెలఁగెనయ్య!
     నీదుపావలు రాజ్యనేతలుగాఁ గొల్చె
               భరతుఁ డక్కట! యెంత భక్తుఁడయ్య!
గీ. చిత్రకూటాద్రిఁ గడుఁ దప్పు జేసినట్టి
     చెడుగుకాకము మరల రక్షించినావు
     రామ! నీ వెంత కరుణాంబురాశివయ్య!
     వైరిహరరంహ! సింహాద్రి నారసింహ!94
సీ. దండకారణ్యదైత్యావళిఁ బరిమార్చి
               సాపరాధు విరాధు రూపుమాపి
     మునుహేతి జుప్పనాతిని విరూపినిఁ జేసి
               ఖరకృత్యు ఖరదైత్యు గండణంచి
     మాయాతినీచుని మారీచుఁ బరిమార్చి
               దుర్మదాంధునిఁ గబంధుని వధించి
     తతవక్రశీలముల్తాళముల్ ఖండించి
               వాలి దోర్బలశాలిఁ గూలనేసి
గీ. తొడరి సుగ్రీవ హనుమదాదులను గూడి
     వనధి గర్వ మడంచి రావణునిఁ ద్రుంచి
     ఘనవిజయ మొందు వీరరాఘవుఁడ వీవు
     వైరిహరరంహ! సింహాద్రి నారసింహ!95
సీ. శాశ్వతంబుగ విభీషణునకు లంక ని
               శ్చలకృప నొసఁగుట దలఁచుకొన్నఁ
     జెఱబడ్డ సురసిద్ధగంధర్వకాం
               తల విడిపించుటఁ దలఁచుకొన్న