పుట:2015.370800.Shatakasanputamu.pdf/240

వికీసోర్స్ నుండి
ఈ పుట అచ్చుదిద్దబడ్డది

సీ. నిదురించినావొ నిర్ణిద్రభద్రాకార!
               కలితభోగీంద్ర భోగంబుమీఁద
     శయనించినావొ శైశవమూర్తితోఁ బయః
               పాథోధిపటువటపత్రసీమఁ
     బవళించినావొ శ్రీభామినీదోర్మూల
               కూలంకషస్తనకుంభయుగళిఁ
     బడకగావించితో భక్తసమ్రాణ్మన
               స్సంకల్పితానల్పశయ్యయందు
గీ. నిబిడపాశ్చాత్యభీతులై నిఖిలజనులు
     కదసి మొరవెట్ట నీకెట్లు నిదురపట్టె?
     లెమ్ము నాసామి! జాగేమి! చిమ్ము రిపుల
     వైరిహరరంహ! సింహాద్రి నారసింహ!40
సీ. నినుఁ బూజ గావింప ఘనవిప్రు లేటికి
               కొదువగాకుంజ సయ్యదులె కలరు
     వినుతింప శాస్త్రజ్ఞవిద్వాంసు లేటికి
               వీలుగా మించు మౌల్వీలె కలరు
     ఆత్మకీర్తన సేయ హరిభక్తు లేటికిఁ
               గేకలు వేయ ఫకీర్లు కలరు
     పూతాత్ములగు ననుష్ఠాతలు నీకేల
               తఱచుగా పీరుజాదాలె కలరు
గీ. వట్టియాశల నిటు మెడవట్టిత్రోయఁ
     జూరువట్టుక వ్రేలాడినార మిట్టి
     ముచ్చటకె నీవు పశ్చిమముఖుఁడ వౌట
     వైరహరరంహ! సింహాద్రి నారసింహ!41