పుట:సింహాసన ద్వాత్రింశిక (కొరవి గోపరాజు).pdf/62

వికీసోర్స్ నుండి
ఈ పుట ఆమోదించబడ్డది

శ్రీరస్తు

సింహాసన ద్వాత్రింశిక[1]

ప్రథమాశ్వాసము

___కృత్యాది, దేవతాస్తోత్రాదికము___

శా. శ్రీమత్పర్వతనందనీ[2] తనులతాశ్లింష్టాంగ మై బాహుశా
    ఖామధ్యంబున నున్న పన్నగఫణౌఘం బాకు లై యొప్ప ను
    ద్ధామం బౌ శశికాంతి పుష్పరుచి నొందంగా జటాపల్లవ
    స్తోమం బౌ హరపారిజాతము భజింతు[3] న్వాక్ఫలావాప్తికిన్.

చ. పులుఁగులపెద్ద వారువము, పోటరి బిడ్డఁడు, ఱాఁగరౌతు,[4] పా
    ములగమికాఁడు సెజ్జ, నలుమోములవాఁ డిలుతీర్చుపట్టి, వే
    ల్పులు బలుబంటు, లాకలిమి[5]పొల్తుక, తెల్లనితల్లి పెద్దకో
    డ లనుచు నెల్లవారుఁ బొగడం దగు నల్లనివేల్పుఁ గొల్చెదన్. 2

ఉ. దక్షిణనేత్రకాంతి నుచితంబుగ నర్థవికాస మొంది వా
    మాక్షిరుచిప్రసారమున నర్థము విప్పకయున్న పుండరీ
    కాక్షుని నాభిపద్మనిలయంబునఁ దుమ్మెదభంగి లోలుఁడై
    యక్షయవేదనాదమయుఁడైన విరించిఁ దలంచి మ్రొక్కెదన్. 3

ఉ. కట్టినపట్టపుం దనువు గద్దియతమ్మియ నక్షమాలయుం
   బట్టినచిల్కయు న్నగవుఁ బాపటజల్లియు నొక్కవన్నెగాఁ
   బుట్టుచుఁ బుట్టువిద్యలకుఁ బుట్టినయి ల్లనఁజెల్లి బ్రహ్మవా
   కట్టొనరించిన తన్ముఖవికాసినియౌ సతి మమ్ముఁ గావుతన్. 4

  1. సింహాసనద్వాత్రింశతి యనియుం గలదు.
  2. నందనా
  3. నుతింతున్.
  4. రాగెరౌతు,రాగకౌతు
  5. లాల్కమలపొల్తుక