పుట:సింహాసన ద్వాత్రింశిక (కొరవి గోపరాజు).pdf/355

వికీసోర్స్ నుండి
ఈ పుట అచ్చుదిద్దబడ్డది

294

సింహాసన ద్వాత్రింశిక


శా.

ఆరాజన్యశిరోమణిం గొలువ నెయ్యం బొప్పఁగా నింపు పెం
పారం దక్కినభూమిపాలురు మహాయత్నంబుతో రత్నము
ల్నారీరత్నములుం గురంగములును న్నాగంబులు న్మున్నుగా
జేర న్వచ్చి వనంబులో విడిసి రాసీమావిభాగంబులన్.

6


ఉ.

ఇంతులమానభంగము మహీరుహపంక్తులదర్పమూల మ
త్యంతమహోత్సవంబులవిహారము జాణలభోగభాగ్య మా
కంతుని ప్రాపు కోకిలశుకంబుల వాచవిపంట నాఁ బ్రజల్
సంతసమంద నంతట వసంతము వచ్చె వనాంతభూమికిన్.

7


మ.

మొదలఁ దక్షిణమారుతంబు వనభూము ల్సోఁకుచు న్వీఁక ను
న్మదపంచాయుధవహ్నిచిహ్న మగు ధూమంబో యన న్వీవఁగాఁ
దుద లొక్కించుక యెండఁ గందు వెడలం ద్రోచెం గడల్ స్రుక్కఁగాఁ
బద నింకెన్ బిరు సయ్యెఁ బండె బడియెం బర్ణంబు లుర్వీస్థలిన్.

8


క.

కాకులలోఁ గోకిలములు
కాకులఁ బడలేక కులము గలయఁగఁ బవనుం
డాకులపా టొనరింపగ
సాకులపా టయ్యె విరహు లగులోకులకున్.

9


క.

శీలము వదలని పథికుల
తాలిమిఁ దూలించు మారుతముపెల్లున నా
భీలం బగుమదనాగ్ని
జ్వాలలక్రియ బాలపల్లవము. లొప్పారెన్.

10


శా.

ఏచెం గ్రొన్నన మాధవీలతలపై నింపెక్కి సంపెంగలుం
బూచె న్మావులుఁ బొన్నలుం బొగడలుం బొల్పొందె రాచిల్కలు
న్వాచాలత్వము సూపెఁ బుప్పొడి దిశ ల్వాసింప సొంపారఁగా
వీచెం గమ్మనితెమ్మెర ల్మరునకు న్వీచోపులై ప్రాపులై.

11