పుట:సింహాసన ద్వాత్రింశిక (కొరవి గోపరాజు).pdf/352

వికీసోర్స్ నుండి
ఈ పుట అచ్చుదిద్దబడ్డది

షష్ఠాశ్వాసము

291


క.

సలసలఁ గ్రాఁగెడు తైలము
కొలఁది యెఱుఁగఁ దలఁచు భంగి గుణరత్నసము
జ్జ్వలుఁడు గుబేలున నుఱికెను
జలనిధిలో నస్తమించు జలజాప్తుక్రియన్.

135


వ.

అంత సంధ్యాంగనయుం బోలె హరిచందనారుణపయోధరభారయు నారక్తాంబరయు వికసదిందీవరాక్షియు రాగవతియు నైన కందర్పసంజీవనీనాగకన్య చనుదెంచి నిజవిద్యాప్రభావంబున నారాజుం బునరుజ్జీవితుం జేసిన.

136


ఆ.

జలజకాంతి మెఱయ జలధి వెల్వడి తూర్పు
గొండ యెక్కునట్టి యెండఱేని
చొప్పు దోఁప నూనెకొప్పెర వెల్వడి
నిలిచె విప్రుమోము తెలివి కెక్క.

137


ఉ.

ఆతనిఁ జూచి కన్య వినయంబున మ్రొక్కి యమేయసాహస
ఖ్యాతచరిత్ర! నాదువ్రతకల్పత నేఁడు ఫలించె నే నిఁక
న్నీతగుదాసి నైతిఁ గరుణింపుము రాజ్య మనుగ్రహింపు సం
ప్రీతి యొనర్చుదానఁ దగురీతి ననుం బని పంపు మిత్తఱిన్.

138


ఉ.

నావుడు దాసివేని విను నావచనం బిఁకఁ ద్రోపుసేయ కీ
దేవసమానునిన్ ధరణిదేవుని సుశ్రుతు నాశ్రయింపు త
ద్భావము వల్లవింప నని పార్థివుఁ డానతి యిచ్చె నంత ల
జ్జావనతాస్య యౌచు నెదురాడక లేమ వరించె విప్రునిన్.

139


మ.

ధరణీనాయకుఁ డిట్లు చేకుఱినకాంతారత్నమున్ రాజ్యమున్
ధరణీదేవున కిచ్చ నిల్పి తనయత్నం బీగతిన్ ధర్మసం
చరణాసక్తి ఫలించె నంచు మదిలో సంతోష ముప్పొంగఁగా
నరుదెంచె న్నిజదానధర్మగుణగణ్యం బైన యుజ్జేనికిన్.

140