పుట:సింహాసన ద్వాత్రింశిక (కొరవి గోపరాజు).pdf/281

వికీసోర్స్ నుండి
ఈ పుట అచ్చుదిద్దబడ్డది

220

సింహాసన ద్వాత్రింశిక


సీ.

పూర్వదిక్పతి యొద్దఁ బొలుపారు గొడుగుపై
        ఖచితమౌ మాణిక్యకలశ మనఁగ
విబుధబాలురఁ గూడి వేడుకతోడ జ
        యంతుఁ డాడెడి బట్టుబంతి యనఁగఁ
బ్రాచీవధూటికాఫాలభాగంబునఁ
        బెట్టిన కెంపులబొ ట్టనంగఁ
దెలివితో నాడెడి దివసఫణీంద్రుని
        తలమీఁద నున్న రత్నం బనంగ


తే.

రక్తకాంతి మెఱయ రచితరక్తాశోక
కింశుకాగ్రగుచ్ఛసంశయంబు
పొడుపుఁగొండమీఁదఁ బొడతెంచెఁ ద్రైలోక్య
మండనంబు భానుమండలంబు.

85


క.

దల మగుదీధితి నుదయా
చల మలరఁగ రూపబోధజననచ్ఛాయా
కలితంబై యర్కునిమం
డల మప్పుడు రత్నదర్పణముగతి నొప్పెన్.

86


సీ.

ఎవ్వనియుదయ మీరేడులోకములకు
        దిక్కాలవృత్తులు దెలుపుచుండు
నెవ్వనితేజ మగ్నీందువైభవముల
        కాధారమును దానయై వెలుంగు
నెవ్వనిమండలం బెల్లయోగీంద్రులుఁ
        జేరుముక్తికి మణిద్వారభూమి
యెవ్వనిమూర్తి వాణీశశంకరవిష్ణు
        రూపమౌ వేదస్వరూప మండ్రు