తృతీయాశ్వాసము 135
క. అడుగులుఁ గెందలిరాకులుఁ
దొడవులుఁ గ్రొవ్విరులుఁ గురులుఁ దుమ్మెదగుములుం
దడఁబడ బడఁతులు బెడఁగడ
రెడు నడగల తీవెలనఁ జరించిరి కవఁకన్. 163
సీ. ఎలమావిజొంపంబు లివె చూడుమనుచు నొం
డొరులకు జూపుచుఁ దిరుగువారుఁ
గరములుఁ బల్లవోత్కరములుఁ దడఁబడ
డాయుచుఁ బువ్వులు గోయువారుఁ
బొలుపారఁ దనువులు పుష్పవల్లులతోడఁ
గూడ డాఁగురుమూత లాడువారు,
దిన్నని యేలలఁ దీపులు రెట్టింపఁ
దీఁగె యుయ్యల లెక్కి తూఁగువారుఁ
తే. బువ్వు దేనియఁ గురియంగఁ బొన్న లెక్కి
మెఱపుల ట్లందు విరులకు మెలఁగువారు
నగుచు బాలికలు వనవిహారలీల
లెనయఁ జెలఁగిరి వనలక్ష్ము లనఁగ నచట. 164
ఉ. వెన్నలి వ్రేలఁగాఁ బిఱిఁదివ్రేఁకట మొయ్యనఁ గ్రింది కీడ్వఁగాఁ
జన్నులమీఁదఁ గ్రిక్కిఱిసి సందెటిదండలు పొంతనిక్కఁగా
సన్నపుఁగౌనుదీఁగఁ గడుసన్నముగా మునివ్రేళ్ళ నిల్పి తాఁ
బొన్నలు గోసెఁ జేతులను బుప్పొడి యొప్పెడుకొమ్మ కొమ్మలన్. 165
ఉ. అత్తతి నత్తలోదరుల కందఱ కందుల కందరాని పూ
గుత్తులఁ జూపి చేకొలఁదిఁ గోయుడు మీరని గ్రుచ్చి వానికై
యెత్తుచుఁ జేయి దప్పె నని యించుక జాఱఁగనిచ్చి యక్కుల..
హత్తుచు నంగసంగసుఖ మందిరి కొందఱు ప్రేమఁ గాముకుల్. 166
