పుట:శిశుపాలవధము (గోపినాధ వెంకటకవి).pdf/9

కృతిపతివంశావతారవర్ణనము

సీ.⁠

వెలయఁ బిల్లలమఱ్ఱి బేతాళనాయఁ డే                         ఘనవంశమున కాదికర్త యయ్యె రంగుగా సర్వజ్ఞ సింగభూపాలకుం                         డేవంశమునఁ బుట్టె నింపుమీఱఁ జెంజిదుర్గాధీశుఁ జించి చెండాడిన                         బంగరేచేంద్రుఁ డేవంశభవుఁడు కోరి డెబ్బదియొక్కగోత్రంబులకు శిరః                         కోటీర మేపుణ్యగోత్ర మట్టి

⁠

గీ.⁠

మేటి రేచెర్ల గోత్ర వెల్గోటివంశ మందు విద్వత్కుమారయాచాభిధాన నృపవరేణ్యుఁడు జన్మించె నిరుపమాన దుగ్ధవారాశియందుఁ జంద్రుండుఁబోలె.

⁠ 28

గీ.⁠

ధరణి నమ్మేటి కీర్తిప్రతాపరుచులు దిశలఁ బర్విన రేపవల్ దెలియలేక సురుచిరంబుగఁ జక్రముల్ జోడుగూడ వీడ సంశయ మొందు నెవ్వేళలందు.

⁠ 29

గీ.⁠

భూరివిద్యల కారాజు భోజరాజు వీర్యవితరణముల కల విక్రమార్కుఁ డుత్తరోత్తరయుక్తిప్రయుక్తులందు జీవసన్నిభుఁ డతఁడని చెప్పవచ్చు.

⁠ 30

గీ.⁠

ఆమహీనాథతిలకున కగ్రసుతుఁడు గలిగె బంగారుయాచభూకాన్తు డనఁగ ముదముతోఁ గశ్యపబ్రహ్మ కదితియందు శక్రుఁ డుదయించినట్లు ప్రసన్నయశుఁడు.

⁠ 31

సీ.⁠

అనఘుఁ డా బంగారుయాచభూమీశుండు                         కాశికాసేతుమార్గంబునందుఁ బేరైన నాయనిపేటఁ గట్టించి య                         చ్చట విశాలంబుగా సత్ర మొకటి నిర్మించి దానికి నిండార నగుటూరి                         సీమాన్తరస్థమై చెలఁగు విన్న మాలయు జువ్వలపాళెంబు నారెండు                         గ్రామంబు లిచ్చి ధర్మం బొనర్చె

⁠

గీ:⁠

నింపుమీఱ నా సత్రమం దిప్పటికిని వచ్చుజనులకు నెపుడు నవ్వారిగాఁగ నిచ్చుచుందురు భూపాలుఁ డేర్పరించి నట్లు భోజనసామగ్రి యనుదినంబు.

⁠ 32

గీ.⁠

మఱియుఁ బోలూరి సీమలో మానితముగ నొప్పునేకొల్లు పొలములో నొక్కసత్ర మొక్కకోనేరు నిర్మించె నుర్వి దాని సన్నుతింతురు దొరవారిసత్ర మనుచు.

⁠ 33