పుట:రామేశ్వరమాహాత్మ్యము (ఏనుగు లక్ష్మణకవి).pdf/103

⁠

నెత్తమ్మిమొగ్గలబిత్తరంబు భ్రమించి         చక్రవాకస్ఫూర్తి నాక్రమించి కుసుమగుచ్ఛంబులపస హసింపఁగఁజాలి         భర్మకుంభములఁ జేపట్ట నేర్చి మత్తవారణకుంభమహిమంబు ఛేదించి         యలఘుపర్వతలీలఁ జులకఁ జూచి

⁠

గీ.⁠

బాహుమూలంబు లొరయుచు బలసి పొగరు కొని విజృంభించి యొప్పులకుప్ప లగుచు మేలువట్రువసిబ్బెంపుమెఱుఁగుగుబ్బ చన్ను లలరారె నల శరచ్చంద్రముఖికి.

⁠ 102

క.⁠

లలితాధరమధురసుధా రలు గ్రోలఁగఁ దలఁచి సుందరం బగునాభీ బిలము వెడలివచ్చినచీ మలబా రన రోమరాజి మగువకుఁ దనరెన్.

⁠ 103

క.⁠

సురకన్య లసురకన్యలు గరుడోరగయక్షరాజకన్యలు నరకి న్నరకన్య లెందరైనను గరిగమనకు దనుజరాజకన్యకు సరియే.

⁠ 104

క.⁠

మొగముసిరి గళముతీరును బిగిగుబ్బలబెడగు నడుముపేదరిక మహో తగ నింతింతని తెలుపఁగ నగునే నలుమోముదమ్ములయ్యకు నైనన్.

⁠ 105

క.⁠

అని పొగడఁదగిన చక్కన తనకన్నియితో సుమాలి తగ భూలోకం బున మెలఁగుచు నొకచోటం గనుగొని వైశ్రవణుఁ బుష్పకస్థుఁ గుబేరున్.

⁠ 106